رونالڈو نے ٹیم کو چھوڑنے کی کوئی دھمکی نہیں دی، پرتگال فٹبال فیڈریشن

دوحہ (اُردو پوائنٹ اخبارتازہ ترین - آن لائن۔ 09 دسمبر2022ء) پرتگال کے کپتان کرسٹیانو رونالڈو کو فیفا ورلڈ کپ کا ایک میچ نہ کھلانے کا فیصلہ کئی دنوں بعد اب بھی خبروں کی زینت بنا ہوا ہے۔غیرملکی میڈیا کے مطابق پرتگال کے ایک اخبار نے اس حوالے سے لکھا تھا کہ کرسٹیانو رونالڈو نے ٹیم کے ہیڈکوچ فرنانڈو سینٹوز کے ساتھ گفتگو میں ٹیم کو چھوڑنے پر غور کیا تھا۔

غیر ملکی میڈیا کے مطابق کئی جگہ رپورٹ کیا گیا ہے کہ کرسٹیانو رونالڈو نے سوئٹزرلینڈ کے خلاف میچ میں نہ کھلانے کے فیصلے پر پرتگال ٹیم کے اسکواڈ کو چھوڑنے کی دھمکی دی تھی۔پرتگال کے اخبار کے اس دعوے کے بعد اب کرسٹیانو رونالڈو نے سوشل میڈیا کے ذریعے اس حوالے سے اپنا ردعمل دے دیا ہے۔کرسٹیانو رونالڈو نے ٹوئٹر پر پیغام میں لکھا کہ ایک قوم اتنی بہادر ہے کہ اپنے آپ کو کسی بھی دشمن سے خوفزدہ نہیں کر سکتی۔

(جاری ہے)

اسٹار فٹبالر نے لکھا کہ ایک ٹیم جو خواب کے لیے آخر تک لڑے گی، ہمارے ساتھ یقین رکھیں۔اس کے علاوہ اس معاملے پر پرتگال فٹبال فیڈریشن نے بھی بیان جاری کیا ہے۔پرتگال فٹبال فیڈریشن نے کرسٹیانو رونالڈو کی دھمکی سے متعلق دعوے کو مسترد کرتے ہوئے واضح کیا کہ کرسٹیانو رونالڈو نے قطر میں ورلڈ کپ کے دوران کسی بھی وقت ٹیم کو چھوڑنے کی دھمکی نہیں دی۔