سائنسدانوں نے زمین کے پلازما کرہ میں چاند کی کشش سے پیدا ہونے والی لہروں کے سگنل دریافت کر لیے

بیجنگ (اُردو پوائنٹ اخبارتازہ ترین - اے پی پی۔ 03 فروری2023ء) چینی اور بین الاقوامی سائنسدانوں کے ایک گروپ نے زمین کے پلازما کرہ میں چاند کی کشش سے پیدا ہونے والی لہروں کے سگنل دریافت کیے ہیں، یہ مقناطیسی کرہ ٹھنڈے پلازما سے بھرا ہوا ہے۔شنہوا خبر رساں ایجنسی کی رپورٹ کے مطابق نیچر فزکس میں شائع ہونے والی یہ تحقیق شانڈونگ یونیورسٹی،چین کی اکیڈمی آف سائنسز کے انسٹی ٹیوٹ آف جیولوجی اینڈ جیو فزکس اور دیگر اداروں کے سائنسدانوں کی جانب سے کی گئی ہے۔

(جاری ہے)

ٹیم نے گزشتہ 40 سالوں کے دوران 10 سے زائد سیٹلائٹس کے ڈیٹا کا تجزیہ کیا جس سے یہ بات سامنے آئی کہ پلازما کرہ میں قمری کشش سے پیدا ہونے والے سگنل میں الگ الگ روزانہ اور ماہانہ وقفے ہوتے ہیں، جو دوسرے خطوں میں پہلے دیکھے گئے قمری لہر کے اثرات سے مختلف ہیں۔ تحقیق کے یہ نتائج دوسرے سیاروں کے سسٹمز میں مستقبل کی تحقیق کے لیے اہم معلومات فراہم کرتے ہیں اور زمین اور چاند کے آپس کے تعلق کے بارے میں ہماری معلومات اور تفہیم میں اضافہ کرتے ہیں۔