تیج نارائن چندرپال نے تیسرے ہی میچ میں والد سے بڑی اننگز کھیل ڈالی

بولاویو (اردو پوائنٹ تازہ ترین اخبار ۔ 6 فروری 2023ء ) نوجوان ویسٹ انڈین ٹیسٹ کرکٹر تیج نارائن چندرپال نے اپنے کیریئر کے تیسرے ہی میچ میں والد شیو نارائن چندر پال کو پیچھے چھوڑ دیا۔ زمبابوے کے خلاف بلاوائیو میں کھیلے جانے والے ٹیسٹ کی پہلی اننگز میں تیج نارائن چندرپال نے شاندار بلے بازی کا مظاہرہ کرتے ہوئے ڈبل سنچری داغ دی۔ ان کے اور کپتان کریگ بریتھویٹ کے درمیان 335 رنز کی شاندار اوپننگ پارٹنر شپ قائم ہوئی۔

(جاری ہے)

ویسٹ انڈیز نے اپنی اننگز 447 رنز پر ڈکلیئر کردی جس میں تیج نارائن چندر پال 207 رنز بنا کر ناٹ آؤٹ رہے۔ خیال رہے کہ اس سکور کے ساتھ انہوں نے ٹیسٹ کرکٹ میں والد سے زیادہ بڑی اننگز کھیل لی۔ واضح رہے کہ شیو نارائن چندرپال کی ٹیسٹ کرکٹ میں سب سے بڑی اننگز 203 رنز ناٹ آؤٹ تھی۔ یہ سکور انہوں نے ایک نہیں بلکہ دو مرتبہ سکور کیا۔ شیونارائن چندر پال نے اپریل 2005ء میں جنوبی افریقہ کے خلاف جب کہ نومبر 2012ء میں بنگلادیش کے خلاف 203 رنز کی ناقابلِ شکست اننگز کھیلی تھیں۔