سابق پولیس انسپکٹرعابد باکسر تفتیش کے سات روزہ جسمانی ریمانڈ پر پولیس کے حوالے

جمعرات 19 اکتوبر 2023 22:58

لاہور (اُردو پوائنٹ اخبارتازہ ترین - آن لائن۔ 19 اکتوبر2023ء) لاہور کی انسداد دہشت گردی کی خصوصی عدالت نے سرکاری رائفل چھیننے اور پولیس حراست سے فرار ہونے کے مقدمے میں سابق پولیس انسپکٹر عابد باکسر کو تفتیش کے سات روزہ جسمانی ریمانڈ پر پولیس کے حوالے کر دیا۔ انسدادِ دہشت گردی کی خصوصی عدالت کے جج نے عابد باکسر کے خلاف کیس کی سماعت کی۔

(جاری ہے)

دوران سماعت پولیس نے سخت سکیورٹی میں سابق پولیس انسپکٹر عابد کو عدالت کے روبرو پیش کیا۔

دوران سماعت تفتیشی افسر نے بتایا کہ ملزم پر تھانہ فیصل ٹاؤن میں سرکاری رائفل چھیننے اور پولیس حراست سے فرار ہونے کا مقدمہ درج ہے۔ ملزم سے تفتیش کے لیے چودہ روز کا جسمانی ریمانڈ دیا جائے۔ عدالت نے دلائل مکمل ہونے پر سابق انسپکٹر عابد باکسر کا سات دن کا جسمانی ریمانڈ منظور کر لیا اور آئندہ سماعت پر تفتیشی رپورٹ طلب کر لی۔ عدالت نے عابد باکسر کو دوبارہ 26 اکتوبر کو پیش کرنے کا حکم دیا۔۔