ڈپٹی سپیکر قومی اسمبلی سید غلام مصطفیٰ شاہ سے پولیٹیکل قونصلر یو کے ہائی کمشنر زوئی ویئر کی ملاقات

جمعرات 25 اپریل 2024 18:51

اسلام آباد (اُردو پوائنٹ اخبارتازہ ترین - اے پی پی۔ 25 اپریل2024ء) ڈپٹی سپیکر قومی اسمبلی سید غلام مصطفیٰ شاہ نے کہا ہے کہ پاکستان برطانیہ کے ساتھ اپنے دیرینہ تعلقات کو قدر کی نگاہ سے دیکھتا ہے،یو کے پارلیمنٹ مدر آف آل پارلیمنٹ کہلاتی ہے اور اس کی پارلیمانی روایات قابل قدر ہیں۔ان خیالات کا اظہار انہوں نے پولیٹیکل قونصلر برٹش ہائی کمیشن زوئی ویئر سے اسلام آباد میں ملاقات کے دوران کیا۔

(جاری ہے)

ڈپٹی سپیکر سید غلام مصطفیٰ شاہ نے کہا کے پارلیمانی تعاون کو فروغ دینے سے دونوں ممالک کے درمیان تعلقات کو مزید وسعت دی جا سکتی ہے۔انہوں نے کہا کہ انرجی، سرمایہ کاری، تجارت اور تعلیم کے شعبوں میں تعاون کو بڑھانے سے پاک برطانیہ تعلقات مزید گہرے ہوں گے۔پولیٹیکل قونصلر برٹش ہائی کمیشن زوئی ویئر نے ڈپٹی سپیکر قومی اسمبلی سید غلام مصطفیٰ شاہ کو بطور ڈپٹی سپیکر کامیاب ہونے پر مبارکباد پیش کی۔ انہوں نے کہا کہ برطانیہ تعلیم، توانائی، تجارت اور سرمایہ کاری کے شعبے میں پاکستان کی حمایت جاری رکھے گا۔