حکومت کا ملک کو برآمدی مرکز میں تبدیل کرنے کا وسیع تر وژن ہے، وزیر مملکت برائے آئی ٹی شزہ فاطمہ سے گوگل فار ایجوکیشن ٹیم کی مقامی پارٹنر ٹیک ویلی پاکستان کے ہمراہ ملاقات

اسلام آباد (اُردو پوائنٹ اخبارتازہ ترین - اے پی پی۔ 02 مئی2024ء) وزیر مملکت برائے آئی ٹی شزہ فاطمہ نے کہا ہےکہ حکومت کا ملک کو برآمدی مرکز میں تبدیل کرنے کا وسیع تر وژن ہے، حکومت انسانی وسائل، خدمات اور ٹیکنالوجی میں پاکستان کی برآمدی صلاحیت کو بڑھانے پر توجہ مرکوز کرتے ہوئے اس تبدیلی کو فعال طور پر سہولت فراہم کرے گی۔ جمعرات کو وزارت آ ئی ٹی سے جاری کردہ بیان کے مطابق گوگل فار ایجوکیشن ٹیم نے اپنے مقامی پارٹنر ٹیک ویلی پاکستان کے ساتھ جمعرات کو وزیر مملکت برائے آئی ٹی و ٹیلی کمیونیکیشن شزہ فاطمہ خواجہ سے ان کے دفتر میں ملاقات کی۔

وفد میں پال ہچنگز، ریجنل ہیڈ، گوگل فار ایجوکیشن، ٹم پاولینی، سپیشل پروجیکٹس، اے پی اے سی، ہیرس سفیان، ایجوکیشن لیڈ پاکستان اور عمر فاروق، سی ای او ٹیک ویلی شامل تھے۔

(جاری ہے)

گفتگو کے دوران سکول سے باہر بچوں کو ان آلات سے آراستہ کرنے پر توجہ مرکوز کی گئی جن کی انہیں ضرورت ہے۔ گوگل فار ایجوکیشن کے آئندہ اقدامات کا مقصد تعلیمی فرق کو پر کرنا اور اس بات کو یقینی بنانا ہے کہ پاکستان میں ہر کسی کو گوگل فار ایجوکیشن ٹولز اور کروم بکس کے ذریعے معیاری تعلیم تک رسائی حاصل ہو۔

وفد سے گفتگو کرتے ہوئے وزیر مملکت برائے آئی ٹی نے کہا کہ حکومت پاکستان کا ملک کو برآمدی مرکز میں تبدیل کرنے کا وسیع تر وژن ہے۔ اس منصوبے میں نہ صرف مینوفیکچرنگ بلکہ علم کی منتقلی بھی شامل ہے۔انہوں نے کہا کہ حکومت انسانی وسائل، خدمات اور ٹیکنالوجی میں پاکستان کی برآمدی صلاحیت کو بڑھانے پر توجہ مرکوز کرتے ہوئے اس تبدیلی کو فعال طور پر سہولت فراہم کرے گی۔وہ ہمیشہ بدلتے ہوئے تکنیکی منظرنامے کا اعتراف کرتے ہیں اور اس تیز رفتار ترقی کے ساتھ رفتار برقرار رکھنے کے لیے حکمت عملی تلاش کر رہے ہیں۔