انتخابی نشان واپس لینے کے قانون کیخلاف فل بنچ کیلئے چیف جسٹس لاہور ہائیکورٹ کو بھجوا دی

منگل 14 مئی 2024 20:10

%لاہور (اُردو پوائنٹ اخبارتازہ ترین - آن لائن۔ 14 مئی2024ء) لاہور ہائیکورٹ کے جسٹس علی باقر نجفی کی سربراہی میں دو رکنی بینچ نے سیاسی جماعتوں سے انتخابی نشان واپس لینے کے قانون کیخلاف انٹراکورٹ اپیل سماعت کیلئے فل بنچ کے روبرو سماعت کیلئے مقرر کرنے کیلئے چیف جسٹس لاہور ہائیکورٹ کو بھجوا دی۔

(جاری ہے)

زمان خان وردگ نے اپیل میں موقف اپنایا کہ ہائیکورٹ کے سنگل بنچ نے حقائق کے برعکس فیصلہ جاری کیا، عدالتی فیصلے نے سیاسی پارٹی کو یونین بنا دیا ہے،آئین کے آرٹیکل 17 کی شق ایک کے تحت پارٹی اور یونین کا آپس میں کوئی تعلق نہیں ہے، آئین کے آرٹیکل 17 کی شق دو کے تحت سیاسی جماعت تشکیل پاتی ہے، انتخابی نشان لینا سیاسی جماعت پر پابندی لگانے کے مترادف ہے، الیکشن ایکٹ کی شق 215 آئین اور بنیادی حقوق کے خلاف ہے، الیکشن کمیشن کے کسی جماعت سے انتخابی نشان واپس لینے کا اختیار آئین کے منافی ہے، سپریم کورٹ قرار دے چکی ہے کہ پارٹی الیکشن کا عام انتخابات پر کوئی اثر نہیں ہو سکتا، استدعا ہیکہ عدالت الیکشن ایکٹ کی شق 215 کو کالعدم قرار دے، عدالت الیکشن کمیشن کی جانب سے پی ٹی آئی کا انتخابی نشان واپس لینے کو غیر قانونی عمل قرار دے۔