حکومت ملک میں ڈیجیٹل منتقلی کے لیے پرعزم ہے ، شزہ فاطمہ

اسلام آباد (اُردو پوائنٹ اخبارتازہ ترین - آن لائن۔ 17 مئی2024ء) وزیر مملکت آئی ٹی شزہ فاطمہ نے کہا ہے کہ حکومت ملک میں ڈیجیٹل منتقلی کے لیے پرعزم ہے ، ہر شہری کا حق ہے کہ اسے معیاری انٹرنیٹ، براڈ بینڈ کی سہولیات میسر ہوں ،ملک بھر میں ٹیلی کام سروسز کی فراہمی کے لیے اقدامات جاری ہیں ،کوشش ہے کہ ہر فرد کے ہاتھ میں سمارٹ فون ہو،نیشنل فائبر ایزشن پالیسی کے تحت گھر گھر انٹرنیٹ کی سہولیات مہیا کرینگے ۔

اپنے بیان میں شزہ فاطمہ نے کہا کہ آئی سی ٹی سیکٹر کے فروغ کے لیے کئی اقدامات کئے جارہے ہیں یو ایس ایف کے ذریعے دور دراز علاقوں میں براڈ بینڈ سروسز کی فراہمی کے اقدامات کئے گئے ہیں گزشتہ پانچ سالوں میں انٹرنیٹ براڈ بینڈ سروسز کی فراہمی کے لیے 80بلین روپے کے 85پراجیکٹس ایوار ڈ کئے گئے ہیں ۔

(جاری ہے)

انہوں نے کہا کہ اسپیشل کمیونیکیشن آرگنائزیشن آزاد کشمیر، گلگت بلتستان میں کینکٹوٹی کی فراہمی کے لیئے اہم کردار ادا کر رہی ہے چاہتے ہیں شہری اور دیہی علاقوں کے مابین ڈیجیٹل تقسیم کا خاتمہ ہو کوشش ہے کہ زیادہ سے زیادہ موبائل فونز کی ایکسپورٹ کریں۔

شزہ فاطمہ نے کہا کہ ملک میں سرمایہ کاری کرنے پر حکومت ٹیلی کام انڈسٹری کی شکر گزار ہے ٹیلی کام انڈسٹری مائکرو اکانومی میں ایک اہم ٹیکس پیئر ہے ٹیلی کام انڈسٹری کا ملک کی معاشی ترقی میں اہم کردار ہے حکومت کی توجہ آئی ٹی و ٹیلی کام انڈسٹری کی ترقی پر مرکوز ہے۔ انہوں نے کہا کہ پوری دنیا میں آئی ٹی کے شعبے میں جدت آرہی ہے ، انٹرنیٹ اور کنکٹیوٹی کے بغیر ترقی ممکن نہیں ہے۔

وزیر مملکت شیزہ فاطمہ خواجہ نے کہا کہ 2010 میں شبہاز شریف نے بطور وزیراعلی ای روزگار کا تصور دیا ، گزشتہ 10 سالوں میں 10 لاکھ لیپ ٹاپ تقسیم کیے ،دنیا میں فری لانسنگ کرنے والے پاکستانیوں کی کثیرتعداد نیا نہی لیپ ٹاپس کے ذریعے اپنا نام اور مقام حاصل کیا ہے۔انہوں نے کہا کہ پاکستان میں تھری جی اور فور جی بھی پاکستان مسلم لیگ ن کے دور حکومت میں لانچ ہوا اور اب ہماری حکومت میں ہی فائیو جی لانچنگ کی طرف جارہے ہیں۔

پاکستان میں جتنی بھی ڈیجٹلائزیشن اور آئی ٹی کے شعبے میں ایڈوانسمنٹ ہورہی ہے اس میں پاکستان مسلم لیگ کا کلیدی کردار رہا ہے۔ انہوں نے کہا کہ ہماری کوشش ہے کہ ملک میں موبائل فون استعمال کرنے والے 15 کروڑ صارفین کو بہترین سروسز فراہم کیں جائیں ،ہماری کوشش ہے کہ آنے والی نسلوں کے لئے آسانیاں پیدا کریں۔وزیر مملکت شیزہ فاطمہ خواجہ نے کہا کہ یو ایس ایف کے تحت گزشتہ پانچ سالوں کے دوران کنکٹیوٹی کے حوالے سے 85 ارب روپے کے منصوبے مکمل ہوئے ہیں۔

ان کاکہنا تھا کہ ہماری حکومت کا فوکس انٹرپینورشپ پر ہے تا کہ ہماری نوجوان نسل ملازمتوں کی تلاش کی بجا ئے ملازمتیں پیدا کرنے والی بن جائے۔ انہوں نے کہا کہ پاکستان آپٹیکل فائبر بنانے والا ملک ہے ،گزشتہ کچھ سالوں میں ایک لاکھ 30 ہزار کلومیٹر فائبر آپٹیکل تیار کیا گیا ہے۔ انہوں نے کہا کہ ہمارے ملک میں موبائل فون کی 95 فیصد ضروریات مقامی طور پر تیار ہونے والے موبائل فون پوری کر رہے ہیں ، ہماری کوشش ہے کہ مقامی طور پر تیار ہونے والے موبائل فون برآمد کیے جائیں۔