صوبائی وزیر صنعت و تجارت چوہدری شافع حسین سے پاکستان کوٹینگ ایسوسی ایشن کے وفد کی ملاقات

لاہور (اُردو پوائنٹ اخبارتازہ ترین - اے پی پی۔ 17 مئی2024ء) صوبائی وزیر صنعت و تجارت چوہدری شافع حسین سے پاکستان کوٹینگ ایسوسی ایشن کے وفد نے ٹیوٹا سیکرٹریٹ میں ملاقات کی۔اس موقع پر پینٹ انڈسٹری کی پیداواری صلاحیت،خام مال کی درآمد اور انڈسٹری کے مسائل پر بات چیت ہوئی۔ٹیوٹا اور کوٹینگ ایسوسی ایشن کے مابین تعاون کی مفاہمتی یادداشت پر بھی دستخط کئے گئے۔

معاہدے کی رو سے انڈسٹری کی ضرورت کے مطابق کورسز اور ہنرمند افرادی قوت کی تیاری میں باہمی تعاون ہوگا۔چیئرمین ٹیوٹا بریگیڈیئر ریٹائرڈ محمد ساجد کھوکھر اور کوٹینگ ایسوسی ایشن کے سینئر نائب صدر بدر ہارون نے معاہدے پر دستخط کئے۔صوبائی وزیر صنعت و تجارت چوہدری شافع حسین نے اجلاس سے خطاب کرتے ہوئے کہا کہ پینٹ انڈسٹری سے تعاون کا معاہدہ خوش آئند ہے،ٹیوٹا پینٹ انڈسٹری کو ہنرمند افرادی قوت فراہم کرسکتاہے،ٹیوٹا کے اداروں میں کوٹینگ انڈسٹری سے متعلقہ کورسز متعارف کرائے جائیں گے۔

(جاری ہے)

چوہدری شافع حسین نے کہاکہ ٹیوٹا کے لاہورکے کالجوں میں 3 سالہ پینٹ اینڈ انک کا جدید کورس شروع کیا جائے گا،6 ماہ کے کورسز بھی متعارف کرائے جائیں گے۔پینٹ انڈسٹری کو ہنرمند افرادی قوت فراہم کرکے برآمدات بڑھائی جا سکتی ہیں جبکہ پنجاب تیانج یونیورسٹی آف ٹیکنالوجی میں پینٹ انڈسٹری کے حوالے سے ڈگری پروگرام بھی شروع کیا جاسکتا ہے۔صوبائی وزیر نے کہاکہ چیف منسٹر سکل ڈویلپمنٹ پروگرام کا آغاز کردیا گیا ہے۔

پروگرام کے تحت نوجوانوں کو انفارمیشن ٹیکنالوجی کے کورسز مفت کرائے جا رہے ہیں،کورسز کی انٹرنیشنل سرٹیفکیکیشن بھی ہوگی۔صوبائی وزیر صنعت و تجارت نے کہاکہ ٹیکنیکل ایجوکیشن اور اداروں کی اپ گریڈیشن کے مرحلہ وار پروگرام کا آغاز کر دیا ہے۔اس موقع پرچیئرمین ٹیوٹا بریگیڈیئر ریٹائرڈ محمد ساجد کھوکھر،سینئر ڈی جی اختر عباس بھروانہ، ایسوسی ایشن کے وقاص مغل، کامران عابد،محمد عمران سلہری اور دیگر موجود تھے۔