ضابطہ اخلاق پر سختی سے عمل درآمد جیسے اقدامات کو کنٹی جینسی پلان کا حصہ بنایا جائے، ضیاء الحسن لنجار

کراچی (اُردو پوائنٹ اخبارتازہ ترین - آن لائن۔ 18 مئی2024ء) وزیرداخلہ سندھ نے پولیس کو جاری رہنما ہدایات میں کہا ہے کہ چرم قربانی کے حوالے سے ضابطہ اخلاق پر عمل درآمد اور سیکیورٹی کے جملہ اقدامات کو غیر جانبدارانہ بنانے کے ضمن میں تمام اسٹیک ہولڈرز کو اعتماد میں لیتے ہوئے رینج زونز اور ڈسٹرکٹس کی سطح پر عیدالاضحیٰ سال2024 کنٹی جینسی پلان ترجیحی بنیاد پر مرتب کرکے برائے ملاحظہ ارسال کیا جائے تاکہ عوام کے جان ومال کے تحفظ کو یقینی بنایا جاسکی.انہوں نے کہا کہ تمام رجسٹرڈ فلاحی و سماجی اداروںوتنظیموں،دینی مدارس وغیرہ ودیگراسٹیک ہولڈرز کو حکومت سندھ کی جانب سے جاری ضابطہ اخلاق کے مندرجات و شرائط کا پابند بنانے کے ساتھ ساتھ چرم قربانی کو اکٹھا کرنے اور منتقلی کے حوالے سے جاری تحریری اجازت ناموں اور دیگر ضروری دستاویزات کی چھان بین کے عمل کو کنٹی جینسی پلان کا حصہ بنایا جائے۔

(جاری ہے)

ضیاء الحسن لنجار نے کہا کہ عیدالاضحٰی سیکیورٹی پلان کے تحت سینٹرل پولیس آفس میں قائم مرکزی کمانڈ اینڈ کنٹرول سینٹر سے وقتاّ فوقتاّجاری احکامات پر عمل درآمد کے لیے ہر سطح پر اقدامات کیئے جائیں تاکہ سرویلینس ونگرانی و مانیٹرنگ کی بدولت مشکوک،مشتبہ سرگرمیوں کا پتا لگا کر ممکنہ گھناؤنے عزائم کے بروقت سدباب کو ممکن بناتے ہوئے قیام امن اور حالات پر مکمل پولیس کنٹرول کو یقینی بنایا جاسکے۔

علاوہ ازیں اس سلسلے میں شہر میں قائم زونل ضلعی کنٹرول رومز اور تھانہ جات کے وائرلیس کنٹرول رومز کے باہمی روابط جیسے اقدامات کو بھی انتہائی مربوط اور موثر بنایا جائے۔انہوں نے کہا کہ صوبے کی تمام مساجد،امام بارگاہوں، عیدگاہوں اور نماز عید کے دیگر کھلے مقامات کی فہرستوں کا جائزہ لیا جائے اور بعدازاں انہیں درجہ بندیوں میں تقسیم کرکے نا صرف متعلقہ پولیس بلکہ پولیس کمانڈوز کی تعیناتیوں کو بھی یقینی بنایا جائے۔

مرتب کردہ پلان میں ایس ایس پیز، ایس پیز، ایس ڈی پی اوز اور ایس ایچ اوزکی ذمہ داریوں کا بھی تفصیلی احاطہ کیا جائے۔وزیر داخلہ سندھ نے کہا کہ سیکیورٹی پلان کے تحت تھانوں کی سطح پر سادہ لباس اہلکاروں پر مشتمل سرویلینس ٹیمیں بھی تشکیل دی جائیں جنکی ڈپلائمنٹ شاپنگ سینٹرز پر ہجوم پبلک مقامات،مویشیاں منڈیوں،مختص کردہ پارکنگ لاٹس اور نماز عید کے مقامات کے اندرونی حصوں اور اطراف میں ممکن بنائی جائے۔#