نیٹ میٹرنگ ختم کرنے کی تیاری، حکومت کا گراس میٹرنگ پالیسی لانے کا عندیہ

اسلام آباد ( اُردو پوائنٹ اخبارتازہ ترین۔ 19 مئی 2024ء ) حکومت نے سولر استعمال کرنے والے صارفین کے لیے نیٹ میٹرنگ ختم کرنے کی تیاری کرتے ہوئے گراس میٹرنگ پالیسی لانے کا عندیہ دے دیا۔ ایکسپریس نیوز کے مطابق حکومت نیٹ میٹرنگ پالیسی ختم کرکے اس کی جگہ گراس میٹرنگ پالیسی لانے کی تیاری کر رہی ہے، جس کے باعث نیٹ میٹرنگ کا فائدہ اٹھانے والے صارفین کو بھی مہنگی بجلی فراہم کی جائے گی، حکومت نے بجلی کی قیمتوں کے بحران پر قابو پانے کیلئے اپنی حکمت عملی کے حوالے سے آئی ایم ایف کو آگاہ کردیا ہے۔

آئی ایم ایف کو حکومتی بریفنگ کے حوالے سے ذرائع نے بتایا ہے کہ حکومت نیٹ میٹرنگ کی پالیسی ختم کرنے جارہی ہے، اور اس کی جگہ گراس میٹرنگ کی پالیسی متعارف کرائی جائے گی، گراس میٹرنگ کے تحت 2 میٹر لگائے جائیں گے، سولر پینل سے پیداشدہ بجلی نینشل گرڈ کو بھیجی جائے گی اور پھر واپس فراہم کی جائے گی، ان کا حساب 2 میٹرز کے ذریعے رکھا جائے گا، نئی پالیسی کے تحت سولر پینل کے حامل صارفین کو قومی گرڈ سے بجلی اسی ریٹ پر مہیا کی جائے گی، جس ریٹ پر دیگر صارفین کو فراہم کی جاتی ہے۔

(جاری ہے)

بتایا گیا ہے کہ گراس میٹرنگ پالیسی کے تحت سولر پینل والے صارفین کو پروٹیکٹڈ کیٹیگری میں رجسٹرڈ نہیں کیا جائے گا، ان کو بجلی کے نرخ نان پروٹیکٹڈ صارفین کی طرح ہی چارج کیے جائیں گے، اس طرح سولر پینلز کے ذریعے فائدہ اٹھانے والے صارفین کے مالی فوائد میں کمی آئے گی۔ معلوم ہوا ہے کہ ایک سال میں سولر لگانے والے صارفین کی تعداد میں 60 فیصد اضافہ ہو چکا ہے، ملک میں سولر استعمال کرنے والے صارفین کی تعداد بڑھ کر ڈیڑھ لاکھ ہوگئی ہے، ماہانہ نیٹ میٹرنگ یونٹس کا شئیر ساڑھے 5 کروڑ یونٹس تک پہنچ چکا ہے، ملک بھر میں سولر سے بجلی کی پیداوار 3 ہزار میگاواٹ تک پہنچ چکی ہے۔