محکمہ خوراک پنجاب نے گندم کی ترسیل پر پابندی کی تردید کردی

لاہور ( اُردو پوائنٹ اخبارتازہ ترین۔ 19 مئی 2024ء ) محکمہ خوراک پنجاب کے ترجمان نے کہا ہے کہ گندم کی ترسیل پر کوئی پابندی نہیں لگائی، گندم خریداری پالیسی 2024ء کے مطابق گندم کی نقل و حمل کی مکمل اجازت ہے۔ تفصیلات کے مطابق محکمہ خوراک پنجاب کی جانب سے گندم کی ترسیل کے بارے میں پالیسی بیان جاری کیا گیا ہے، جس میں ترجمان محکمہ خوراک نے بتایا ہے کہ گندم کی ترسیل پر کوئی پابندی نہیں لگائی، محکمہ خوراک پنجاب نے گندم ترسیل پر پابندی کا کوئی نوٹیفکیشن جاری نہیں کیا، پالیسی کے مطابق گندم کی بین الصوبائی اور بین الاضلاعی نقل وحمل کی مکمل اجازت ہے۔

قبل ازیں یہ اطلاعات سامنے آئی تھیں کہ پنجاب حکومت نے خیبر پختونخوا گندم کی ترسیل پر پابندی عائد کردی ہے، سیکریٹری فوڈ کی جانب سے پنجاب اسمگلنگ کی روک تھام کے لیے اہل افسران کو ذمے داری سونپنے کی ہدایت کرتے ہوئے محکمۂ داخلہ پنجاب نے ڈائریکٹر فوڈ کے نام کے احکامات جاری کردیئے۔

(جاری ہے)

ان خبروں میں محکمۂ داخلہ پنجاب کی جانب سے کہا گیا تھا کہ تمام اضلاع میں 5 روز کے اندر چیک پوسٹوں کو فعال کیا جائے، تمام چیک پوسٹوں پر نیا اور ایماندار عملہ تعینات ہوگا، چیک پوسٹیں فعال کرنے کا مقصد اسمگلنگ کی روک تھام ہے، گندم اب بغیر پرمٹ کے صوبے سے باہر نہیں جائے گی۔

دوسری طرف خیبرپختونخوا کی صوبائی حکومت نے پنجاب کے کاشتکاروں سے 7 ہزار میٹرک ٹن گندم خرید لی، اس حوالے سے صوبائی محکمۂ خوراک کا کہنا ہے کہ اب تک پنجاب کے کاشت کاروں سے 7 ہزار میٹرک ٹن سے زیادہ گندم خریدی گئی ہے، کسانوں سے 3 ہزار 900 روپے فی من کی قیمت پر گندم خریدی جا رہی ہے، خریداری کا یہ سلسلہ 30 جون تک جاری رہے گا، اس کے علاوہ مقامی کاشت کاروں سے بھی 14 ہزار میٹرک ٹن گندم خریدی گئی، صوبائی حکومت کی طرف سے صوبے بھر میں گندم کی خریداری کے لیے 22 مراکز قائم کیے گئے ہیں۔