پاکستان تحریک انصاف کا ٹیریان وائیٹ کیس پراسلام آباد ہائیکورٹ کے تین رکنی بنچ کے فیصلے کا خیرمقدم

منگل 21 مئی 2024 19:47

اسلام آباد(اُردو پوائنٹ اخبارتازہ ترین - این این آئی۔ 21 مئی2024ء) پاکستان تحریک انصاف نیٹیریان وائیٹ کیس پر اسلام آباد ہائیکورٹ کے تین رکنی بنچ کے فیصلے کا خیر مقدم کرتے ہوئے کہا ہے کہ عدّت کیس کی طرح یہ معاملہ بھی نہایت لغو، بیہودہ، گھٹیا اور منصوبہ سازوں کی ذہنی پستی کی علامت تھا۔

(جاری ہے)

اپنے رد عمل کا اظہار کرتے ہوئے ترجمان پی ٹی آئی نے کہا کہ اسلام آباد ہائیکورٹ کے دو ججز واضح طور پر اس معاملے پر پہلے ہی فیصلہ صادر کرچکے تھے جسے چیف جسٹس اسلام آباد ہائیکورٹ کے ذریعے تکنیکی طور پر دوبارہ زندہ کرنے کی مایوس کن کوشش کی گئی،انہوں نے کہا کہ قوم سمجھ چکی ہے کہ بانی چیئرمین پاکستان تحریک انصاف کے خلاف قائم تمام مقدمات کے اہداف سیاسی ہیں۔

ترجمان پی ٹی آئی نے کہا کہ ان تمام مقدّمات کے اہداف خوفزدہ کرکے عمران خان جو جھکنے پر مجبور کرنا یا ان کی کردار کشی کرکے عوام میں ان کے خلاف بدظنی کو ہوا دینا ہے، انہوں نے کہا کہ عمران خان نو ماہ سے قیدِ ناحق کا شکار ہونے اور ہر قسم کے ریاستی جبر و فسطائیت کے باوجود عمران خان خوفزدہ ہیں نہ انہیں مائنس کرنے کے خواب دیکھنے والے عوام کو ان سیالگ کر پائے ہیں۔ترجمان پی ٹی آئی نے کہا کہ عمران خان کے خلاف تمام جھوٹے مقدمات جلد اپنے انجام کو پہنچیں گے۔