رکن اسمبلی ملک احمد سعید ،ڈپٹی کمشنر محمد ارشد بھٹی کے زیر صدارت ڈسٹرکٹ ایگریکلچر ٹاسک فورس کمیٹی کا اجلاس

قصور(اُردو پوائنٹ اخبارتازہ ترین - این این آئی۔ 27 مئی2024ء) رکن صوبائی اسمبلی ملک احمد سعید خاں اور ڈپٹی کمشنر محمد ارشد بھٹی کے زیر صدارت ڈسٹرکٹ ایگری کلچر ٹاسک فورس سب کمیٹی /ایگریکلچر ایڈوائزری کمیٹی کا اجلاس گزشتہ روز ڈی سی کمیٹی روم میں منعقد ہوا۔ جس میںایڈیشنل ڈپٹی کمشنر ریونیو رانا موسیٰ طاہر ، اسسٹنٹ کمشنر قصور عطیہ عنایت مدنی ، ڈپٹی ڈائریکٹر زراعت توسیع ، ڈپٹی ڈائریکٹر لائیو سٹاک، اسسٹنٹ ڈائریکٹر فشریز ، واٹر مینجمنٹ، ایس ڈی او ایری گیشن، ایکسئین واپڈاسٹی ، کسان اتحاد کے عہدیداران سمیت متعلقہ محکمہ جات کے افسران نے شرکت کی۔

اجلاس کو کھاد کی سرکاری نرخ ناموں پر دستیابی‘غیر معیاری بیج و ادویات کی روک تھام کیلئے کئے جانیوالے اقدامات اور زراعت سے منسلک مختلف محکمہ جات کی کارکردگی کے حوالے سے تفصیلی بریفنگ دی گئی ۔

(جاری ہے)

اس موقع پررکن صوبائی اسمبلی ملک احمد سعید خاں نے کہا شعبہ زراعت کی ترقی اور کسانوں کی فلاح وبہبود وزیر اعلی پنجاب مریم نواز شریف کی اولین ترجیح ہے ۔

کسان بھائیوں کو ریلیف فراہم کرنے کیلئے ترجیحی بنیادوں پر اقدامات کئے جا رہے ہیں ۔ پنجاب حکومت کسانوں کیلئے بہت بڑا ریلیف پیکج لا رہی ے۔ زرعی پیکج کے مطابق سبسڈیز ، جدید مشینری سمیت دیگر مختلف اقدامات کے ذریعے شعبہ زراعت میں ترقی ہو گی اور کسان خوشحال ہو گا۔ ڈپٹی کمشنر نے متعلقہ افسرا ن کو ہدایت کی کہ کھاد کی مقررہ قیمتوں پر فراہمی اور غیر معیاری بیج بیچنے والوں کیخلاف سخت قانونی کاروائی کی جائے۔

ٹاسک فورسز اور زراعت افسران انکے خلاف مہم تیز کریں اور کسی کیساتھ کوئی رعایت نہ برتی جائے۔تمام متعلقہ افسران فیلڈ میں نکلیں اور کسانوں کو ریلیف فراہم کرنے کیلئے اپنی تمام توانائیوں کو بروئے کار لائیں اور اس سلسلے میں کسی بھی قسم کی سستی کو برداشت نہیں کیا جائیگا۔