اعجاز چودھری کی نو مئی کے مقدمات میں سزائوں کیخلاف اپیلوں پر پراسیکیوٹر جنرل سے مقدمات کی مکمل تفصیلات طلب

پیر 15 ستمبر 2025 22:56

لاہور(اُردو پوائنٹ اخبارتازہ ترین - این این آئی۔ 15 ستمبر2025ء)لاہور ہائیکورٹ نے تحریک انصاف کے سینئر رہنما اعجاز چودھری کی نو مئی کے مقدمات میں سزائوں کے خلاف اپیلوں پر پراسیکیوٹر جنرل پنجاب سے مقدمات کی مکمل تفصیلات طلب کر تے ہوئے مزید سماعت 25ستمبر تک ملتوی کر دی ۔

(جاری ہے)

لاہور ہائیکورٹ کے جسٹس سید شہباز علی رضوی اور جسٹس طارق محمود باجوہ پر مشتمل دو رکنی بینچ نے سماعت کی جس میں انسداد دہشتگردی عدالت کی سزائوں کو چیلنج کیا گیا ۔

انسداد دہشتگردی عدالت نے اعجاز چودھری کو چار مختلف مقدمات میں قید اور جرمانے کی سزا سنائی تھی۔دوران سماعت مقدمات کے تفتیشی افسر اپنے ڈی ایس پی جاوید آصف کے ہمراہ پیش ہوئے ۔اپیلوں میں موقف اختیار کیا گیا کہ مقدمات بے بنیاد اور سیاسی انتقام پر مبنی ہیں اور سزائیں سناتے وقت حقائق کو نظر انداز کیا گیا ہے، استدعاہے سزائوں کو کالعدم قرار دیا جائے۔ عدالت نے اپیلوں پر مزید کارروائی 25 ستمبر کو ہوگی۔