سیالکوٹ، فصلوں کی باقیات کو جلانے پر تین لاکھ روپے جرمانہ عائد

بدھ 12 نومبر 2025 22:13

سیالکوٹ (اُردو پوائنٹ اخبارتازہ ترین - اے پی پی۔ 12 نومبر2025ء) محکمہ زراعت سیالکوٹ نے یکم اکتوبر سے 12 نومبر تک 20 کسانوں پر فصلوں کی باقیات کو جلانے کی وجہ سے مجموعی طور پر تین لاکھ روپے جرمانہ عائد کیا ہے۔ ان خیالات کا اظہار ڈپٹی ڈائریکٹر زراعت توسیع سیالکوٹ سجاد حیدر نے سموگ کے حوالے سے محکمانہ اقدامات کے متعلق بریفنگ دیتے ہوئے کیا۔ انہوں نے کہا کہ فصلوں کی باقیات کو جلانے کے حوالے سے کارروائیاں ڈسکہ، پسرور اور سمبڑیال کی تحصیلوں میں کی گئی ہیں جبکہ تحصیل سیالکوٹ میں فصلوں کی باقیات جلانے کے متعلق کوئی رپورٹ وصول نہیں ہوئی۔

انہوں نے کہا کہ یکم اکتوبر سے 12 نومبر تک تحصیل ڈسکہ میں ایک لاکھ اور 20 ہزار روپے، تحصیل پسرور میں ڈیڑھ لاکھ روپے اور تحصیل سمبڑیال میں 30 ہزار روپے جرمانہ عائد کیا گیا۔

(جاری ہے)

انہوں نے کہا کہ کسانوں کی آگاہی کیلئے مقامی مساجد میں خصوصی طور پر اعلانات بھی کروائے جاتے ہیں جن میں کسانوں کو باقیات کو نہ جلانے کی ترغیب دی جاتی ہے اور اس حوالے سے ضلع بھر میں 1266 مساجد میں اعلانات کروائے گئےہیں۔

انہوں نے کہا کہ محکمہ زراعت کی طرف سے فصلوں کی باقیات کو آگ لگانے پر 15 ہزار روپے فی ایکڑ جرمانہ عائد کیا جاتا ہے اور اگر دوبار ایسا کیا جائے تو 30 ہزار روپے فی ایکڑ جرمانہ عائد کیا جاتا ہے اور اس کے علاوہ مسلسل خلاف ورزی پر ایف آئی آرز بھی درج کی جا سکتی ہیں اور گرفتاریاں بھی عمل میں لائی جا سکتی ہیں۔

Facebook Twitter Google + Share on Whatsapp

سیالکوٹ، فصلوں کی باقیات کو جلانے پر تین لاکھ روپے جرمانہ عائد

متعلقہ عنوان :

مزید زراعت کی خبریں