پنجاب گرین ٹریکٹر اسکیم کے ضلع 463 کاشتکاروں کو 10 لاکھ روپے سبسڈی پر ٹریکٹر فراہم کر دیئے گئے،ڈپٹی کمشنررحیم یارخان

ہفتہ 15 نومبر 2025 19:53

رحیم یارخان (اُردو پوائنٹ اخبارتازہ ترین - اے پی پی۔ 15 نومبر2025ء) وزیر اعلیٰ پنجاب گرین ٹریکٹر اسکیم کے تحت ضلع کے 463کاشتکاروں کو 10لاکھ سبسڈی پرٹریکٹرز فراہم کئے گئے۔ وزیر اعلیٰ پنجاب گرین ٹریکٹر اسکیم کے تحت محکمہ زراعت توسیع کے زیر اہتمام تقریب کا انعقاد کیا گیا جس میں ڈپٹی کمشنررحیم یارخان ظہیر انو رجپہ نے ایم پی اے نسرین ریاض گجر، سابق ایم این اے میاں امتیاز احمد، سابق ایم پی اے چوہدری محمود الحسن چیمہ، اسسٹنٹ کمشنر عبدالحنان خان،سردار عون لغاری، ڈائریکٹر زراعت جمیل غوری، ڈپٹی ڈائریکٹر زراعت ڈاکٹر مسعود سلیم و دیگر کے ہمراہ بذریعہ قرعہ اندازی کامیاب ہونے والے خوش نصیب زمینداروں کو ٹریکٹرز کی چابیاں فراہم کیں۔

ڈپٹی کمشنر نے اس موقع پر خطاب کرتے ہوئے کہا کہ حکومت پنجاب کی جانب سے کسانوں کی فلاح و بہبود اور زرعی ترقی کے لیے مثالی اقدامات جاری ہیں۔

(جاری ہے)

گرین ٹریکٹر اسکیم کے ذریعے کاشتکاروں کو جدید زرعی مشینری کی فراہمی اُن کی پیداواری استعداد میں اضافہ کرے گی، جس سے زرعی معیشت کو مزید استحکام ملے گا۔حکومت پنجاب کی اسکیم کے تحت ہر ٹریکٹر پر 10 لاکھ روپے کی سبسڈی فراہم کی جا رہی ہے، جس کا مقصد کسانوں پر معاشی بوجھ کم کرنا اور انہیں سہولت کے ساتھ زرعی مشینری فراہم کرنا ہے۔

تقریب سے خطاب کرتے ہوئے ایم پی اے نسرین ریاض گجر، سابق ایم این اے میاں امتیاز احمد، سابق ایم پی اے چوہدری محمود الحسن چیمہ، سردار عون لغاری نے کہا کہ اس انقلابی اسکیم سے نہ صرف کسانوں کو سستی جدید مشینری میسر آئے گی بلکہ زرعی پیداوار میں اضافہ، معاشی استحکام اور پنجاب کی زرعی ترقی میں نمایاں پیشرفت ہو گی۔تقریب میں کاشتکاروں نے حکومت پنجاب کی کوششوں کو سراہا اور ٹریکٹرز کی فراہمی کو زرعی شعبے کے لیے خوش آئند قدم قرار دیا۔\378