کاشتکاروں کو رایا اور سرسوں کو مختلف بیماریوں سے بچانے کیلئے حفاظتی تدابیر پر عملدرآمد کی سفارش

منگل 18 نومبر 2025 17:10

فیصل آباد (اُردو پوائنٹ اخبارتازہ ترین - اے پی پی۔ 18 نومبر2025ء) کاشتکاروں کو رایا اور سرسوں کو مختلف بیماریوں سے بچانے کیلئے حفاظتی تدابیر پر عملدرآمد کی ہدایت کی گئی ہے اور کہاگیاہے کہ چونکہ رایا اور سرسوں کی فصل پر بوائی سے لے کر برداشت تک مختلف بیماریاں حملہ آور ہو سکتی ہیں لہٰذا کاشتکار اس سلسلہ میں چوکنارہیں اور بروقت حفاظتی و تدارکی اقدامات یقینی بنائیں تاکہ فصل کا معیار اور مقدار متاثر نہ ہو۔

پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈزمحکمہ زراعت کے ماہرین نے بتایاکہ سفید کنگھی کے ابتدائی حملہ میں پتوں، تنوں، شاخوں کی اوپری سطح کے اندر سفید چھالے بن جاتے ہیں جو پھول کر پھٹ جاتے ہیں اور ان سے سفید سفوف نکلنا شروع ہو جاتاہے۔

(جاری ہے)

اس طرح پھولوں پر بیماری کے حملہ سے جہاں ایک طرف پھول بد شکل ہو جاتے ہیں وہیں ان میں بیج بھی نہیں بنتا اور پودے کے متاثرہ حصوں میں سڑن پیداہو جاتی ہے۔

انہوں نے بتایا کہ وبائی جھلساؤ کی بیماری کے حملہ سے پتوں، ٹہنیوں، پھلیوں پر سیاہ اور بھورے دھبے نمودار ہوتے ہیں جو پتوں میں سوراخ کاباعث بھی بنتے ہیں۔ انہوں نے کہاکہ بیماری کے شدید حملہ کی صورت میں پھلیاں پتلی اور چھوٹی رہ جاتی ہیں۔ انہوں نے بتایاکہ مرجھاؤ کی بیماری ہر عمر کے پودوں پر اثر اندازہو کر پیداوار کو متاثر کرتی ہے۔ انہوں نے کاشتکاروں کو ہدایت کی کہ وہ محکمہ زراعت کے فیلڈسٹاف یا زرعی ماہرین کی مشاورت سے فصل پر مناسب زہروں کاسپرے یقینی بنائیں تاکہ انہیں بعدمیں کسی پریشانی کا سامنا نہ کرناپڑے۔