سیکرٹری لائیو سٹاک کی زیر صدارت گوشت کی برآمدات میں اضافے کے لیے میٹ ایکسپورٹرز کااجلاس

جمعہ 2 جنوری 2026 21:30

لاہور (اُردو پوائنٹ اخبارتازہ ترین - اے پی پی۔ 02 جنوری2026ء) وزیراعلی پنجاب کے وژن کے مطابق صوبے میں گوشت کی برآمدات میں اضافہ، برآمدی حجم میں بہتری اور قیمتی زرمبادلہ کے حصول کے لیے جمعہ کے روز سیکرٹری لائیو سٹاک پنجاب کی زیر صدارت میٹ ایکسپورٹرز کے ساتھ ایک اہم اجلاس منعقد ہوا۔ اجلاس میں گوشت کی برآمدات سے متعلق درپیش تمام اہم اور متعلقہ امور پر تفصیلی غور کیا گیا۔

اجلاس کے آغاز میں میٹ ایکسپورٹرز کے لیے سہولیات کی فراہمی پر تبادلہ خیال کیا گیا تاکہ برآمدات میں زیادہ سے زیادہ اضافہ ممکن بنایا جا سکے اور قومی معیشت کو مستحکم کیا جا سکے۔ اس کے بعد ٹریس ایبیلٹی کے نظام سے متعلق امور زیر بحث آئے تاکہ برآمدی معیار، شفافیت اور عالمی تقاضوں کی موثر تکمیل یقینی بنائی جا سکے۔

(جاری ہے)

مزید برآں حکومت پنجاب کی جانب سے ڈیزیز فری زونز اور ڈیزیز کنٹرول کمپارٹمنٹس کے قیام کے اقدامات پر تفصیلی گفتگو کی گئی۔

اس امر پر بھی غور کیا گیا کہ لائیو سٹاک کنیکٹ ایپ کے ذریعے ایک موثر فورم، ڈیش بورڈ یا پلیٹ فارم تشکیل دیا جائے تاکہ میٹ ایکسپورٹرز کو فیٹنینگ اور فیڈلاٹ فارمرز تک براہِ راست رسائی حاصل ہو سکے۔اجلاس میں پنجاب لائیو سٹاک کارڈ اسکیم پر بھی تفصیلی تبادلہ خیال کیا گیا اور واضح کیا گیا کہ اس اسکیم کے تحت رجسٹرڈ جانور پہلے ہی برآمدات کے لیے موزوں ہیں۔

ان جانوروں کو برآمدی چینل میں موثر طور پر شامل کرنے کے طریقہ کار پر بھی غور کیا گیا۔اس کے علاوہ گوشت کی پیداوار میں اضافے کے لیے برہمن نسل کے سیمن کے استعمال اور اس کی ترویج سے متعلق امور پر بھی بات چیت کی گئی، جبکہ حکومت پنجاب کی جانب سے اس حوالے سے کیے جانے والے اقدامات سے شرکا کو آگاہ کیا گیا۔اجلاس کے اختتام پر شرکا نے حکومت پنجاب کی جانب سے ڈیزیز فری زونز اور ڈیزیز کنٹرول کمپارٹمنٹس کے قیام کے اقدامات کو سراہا اور گوشت کی برآمدات کے فروغ کے لیے حکومتی پالیسیوں پر اعتماد کا اظہار کیا۔