محکمہ زراعت پنجاب نے گندم کی فصل کی بہتر نگہداشت کے لئے سفارشات جاری کردیں

پیر 5 جنوری 2026 21:34

لاہور (اُردو پوائنٹ اخبارتازہ ترین - اے پی پی۔ 05 جنوری2026ء) ترجمان محکمہ زراعت پنجاب نے کہا ہے کہ گندم کی بھر پور پیداوار کے حصول کے لیے متوازن کھادوں کا استعمال نہایت ضروری ہے جس میں نائٹروجنی، فاسفورسی اور پوٹاش والی کھادیں شامل ہیں۔

(جاری ہے)

ترجمان نے مزید کہا کہ متوازن کھادوں کے استعمال سے پودے کی نشونما بہتر ہوتی ہے، جڑوں کے نظام میں بہتری آتی ہے، دانوں کا سائز اور کوالٹی بہتر ہوتی ہے، پودوں میں بیماریوں اور کیٹروں کے خلاف قوت مدافعت پیدا ہوتی ہے اور اس طرح پیداوار میں اضافہ ہوتا ہے۔

کاشتکارگندم کو بقیہ نائٹروجنی کھاد پہلے اور دوسرے پانی کے ساتھ برابر اقساط میں استعمال کریں جبکہ ریتلے علاقوں میں تین برابر اقساط میں ڈالیں کیونکہ ایسی زمینوں میں اس کے ضائع ہونے کااحتمال زیادہ ہوتا ہے۔ اگر فاسفورسی یا پوٹاش کھاد بوقت کاشت نہ ڈالی جا سکے تو پہلے پانی کے ساتھ ڈالیں۔اس کے علاوہ گندم کے کھیت سے جڑی بوٹیوں کی بروقت تلفی کو یقینی بنائیں۔