کاشتکار کانگیاری سے متاثرہ کماد کے پودے جلا کر تلف کردیں، محکمہ زراعت سمبڑیال

منگل 6 جنوری 2026 11:57

سیالکوٹ (اُردو پوائنٹ اخبارتازہ ترین - اے پی پی۔ 06 جنوری2026ء) اسسٹنٹ ڈائریکٹر محکمہ زراعت سمبڑیال ڈاکٹر افتخار حسین بھٹی نے کہا ہے کہ کاشتکار کانگیاری سے متاثرہ کماد کے پودے جلا کر تلف کردیں تاکہ ستمبر کاشتہ فصل کو مختلف بیماریوں کے حملہ سے محفوظ رکھا جاسکے۔

(جاری ہے)

انہوں نے کہاکہ چوٹی کی سڑاند کی بیماری کے حملہ کی صورت میں پتوں پر باریک سوراخ نمودار ہونا شروع ہو جاتے ہیں اور اس طرح فصل آہستہ آہستہ سوکھ جاتی ہے جس سے گنے کی پور یاتو بہت چھوٹی اور یا بہت پتلی رہ جاتی ہے، اگر حملہ شدت اختیارکرلے تو گنے کا اوپر کاحصہ بھورا ہو کر گلنا سڑنا شروع ہو جاتا ہے۔

اسسٹنٹ ڈائریکٹر نے کہاکہ کانگیاری کی بیماری سے متاثرہ گنے پتلے ہو جاتے ہیں لہذا اس کے تدارک کےلئے بیمار پودوں کو کاٹ کر فوری جلا دینا چاہیے۔ انہوں نے کہاکہ کاشتکار متاثرہ کھیت کا مونڈھا بھی نہ رکھیں کیونکہ اس سے فصل کو نقصان پہنچ سکتا ہے۔ انہوں نے کہاکہ کاشتکار بیماریوں کے تدارک کےلئے زہروں کا استعمال محکمہ زراعت کے فیلڈ سٹاف یا افسران کی مشاورت سے کر سکتے ہیں۔