شدید برفباری نے دھیرکوٹ کو مفلوج کر دیا،عوام محصور، حکومت فوری اقدامات کرے،سعود عباسی

منگل 27 جنوری 2026 14:25

کیلگری(اُردو پوائنٹ اخبارتازہ ترین - این این آئی۔ 27 جنوری2026ء) نوجوان اوورسیز کشمیری رہنما سعود عباسی نے آزاد جموں وکشمیر کے علاقے دھیرکوٹ میں شدید برفباری کے بعد پیدا ہونے والی سنگین صورتحال پر گہری تشویش کا اظہار کرتے ہوئے کہا ہے کہ سڑکوں کی بندش،بجلی کی طویل بندش اور مواصلاتی نظام کی ناکامی کے باعث عوام گھروں میں محصور ہو کر رہ گئی ہے۔

میڈیا سے گفتگو کرتے ہوئے انہوں نے کہا کہ دھیرکوٹ اور گردونواح میں تمام رابطہ سڑکیں بند ہونے کی وجہ سے اشیائے خوردونوش کی شدید قلت پیدا ہو چکی ہے جبکہ مریضوں کے لیے ہسپتالوں تک پہنچنا ناممکن ہو گیا ہے جو ایک انسانی المیے کو جنم دے سکتا ہے۔انہوں نے افسوس کا اظہار کرتے ہوئے کہا کہ اس ہنگامی صورتحال سے نمٹنے کے لیے کسی قسم کی موثر منصوبہ بندی نظر نہیں آ رہی۔

(جاری ہے)

سعود عباسی نے کہا کہ شدید سردی،بنیادی سہولیات کی عدم دستیابی اور حکومتی غفلت نے عوام کی مشکلات میں بے پناہ اضافہ کر دیا ہے۔ بزرگ،خواتین اور بچے سب سے زیادہ متاثر ہو رہے ہیں۔انہوں نے حکومتِ آزادکشمیر سے پرزور مطالبہ کیا کہ وہ ہوش کے ناخن لے،فوری طور پر دھیرکوٹ کی تمام سڑکیں بحال کرے،بجلی و مواصلاتی نظام کو فعال بنائے اور متاثرہ علاقوں میں ہنگامی بنیادوں پر راشن اور طبی سہولیات فراہم کی جائیں تاکہ قیمتی انسانی جانوں کو بچایا جا سکے۔