محکمہ زراعت نےغیر منظورشدہ بیج ودیگر زرعی اجناس کی تشہیر و فروخت کے بڑھتے ہوئے رجحان کا نوٹس لے لیا

پیر 16 فروری 2026 18:24

ملتان (اُردو پوائنٹ اخبارتازہ ترین - اے پی پی۔ 16 فروری2026ء) محکمہ زراعت پنجاب نےغیرمنظورشدہ بیج و دیگر زرعی اجناس کی تشہیروفروخت کے بڑھتے ہوئے رجحان کا نوٹس لیتے ہوئےغیر منظورشدہ بیج و دیگر زرعی اجناس کی تشہیری مہم میں ملوث عناصرکے خلاف سائبرقوانین کے تحت سخت کارروائی عمل میں لانے کا حکم دیدیا ۔

(جاری ہے)

ترجمان محکمہ زراعت کے مطابق کپاس، دھان و دیگر فصلوں کےغیرمنظورشدہ بیج کی اقسام اور دیگر زرعی اجناس کی سوشل میڈیا اور دیگر پلیٹ فارمز پر تشہیر اور خرید و فروخت نہ صرف قانوناً جرم ہے بلکہ یہ فصلوں کی فی ایکڑ پیداوارکے لیے بھی انتہائی نقصان دہ ثابت ہو سکتی ہے۔

ترجمان محکمہ زراعت نے واضح کیا ہے کہ سوشل میڈیا پر غیر منظورشدہ اقسام کے بیج اور دیگرزرعی اجناس کی فروخت کا پروپیگنڈاکاشتکاروں کوگمراہ کرنے کے مترادف ہے،ایسی تشہیری مہم میں ویڈیو/ تصویرمیں دکھائی جانے والی فصل تلف کر دی جائے گی۔ انہوں نے مزید کہا ہے کہ اس ضمن میں تشہیری مہم میں ملوث عناصر کے خلاف سائبرقوانین کے تحت سخت کارروائی عمل میں لائی جائے گی۔