ہائی ٹیک میکانائزیشن اسکیم کا مقصد جدید ٹیکنالوجی کو فروغ دے کر فی ایکٹر پیداوار میں اضافہ کرنا ہے، ڈاکٹر ساجد الر حمٰن

منگل 17 فروری 2026 19:30

فیصل آباد (اُردو پوائنٹ اخبارتازہ ترین - اے پی پی۔ 17 فروری2026ء) ڈائریکٹر جنرل زرعی تحقیق پنجاب ڈاکٹر ساجد الرحمٰن نے کہا ہے کہ ہائی ٹیک میکانائزیشن اسکیم حکومت پنجاب کا ایک انقلابی اقدام ہے جس کا مقصد زرعی شعبے میں جدید ٹیکنالوجی کو فروغ دینا، پیداواری لاگت میں کمی لانا اور فی ایکڑ پیداوار میں اضافہ کرنا ہے۔ وہ ایوب ایگریکلچر ریسرچ فیصل آباد میں محکمہ زراعت پنجاب کے فیلڈ ونگ کے زیراہتمام ہائی ٹیک فارم میکانائزیشن نمائش کا افتتاح کرنے کے موقع پر صحافیوں سے گفتگو کر رہے تھے۔

نمائش میں مختلف کمپنیوں کی جانب سے جدید زرعی آلات پیش کیے گئے جن میں کبوتا کمپنی کے رائس ہارویسٹر اور رائس ٹرانسپلانٹر سمیت دیگر جدید مشینری شامل تھی۔ انہوں نے کہاکہ اس اسکیم کے تحت کسان حکومت پنجاب کے تعاون سے پانچ سال کی مدت کے لیے تین کروڑ روپے تک کا قرض حاصل کر کے جدید زرعی مشینری خرید سکتے ہیں۔

(جاری ہے)

اس سہولت کے ذریعے کسان ہائی ٹیک مشینری مثلاً رائس ہارویسٹر، رائس ٹرانسپلانٹر، جدید کمبائن، اور ہائی پاور ٹریکٹرز حاصل کر کے اپنی زرعی استعداد میں نمایاں اضافہ کر سکتے ہیں۔

انہوں نے کہا کہ تقریب کا بنیادی مقصد جدید زرعی ٹیکنالوجی کو عام، کسانوں کو سہولیات فراہم اور صوبہ پنجاب میں زرعی ترقی کو مزید مستحکم بنانا ہے اور یہ نمائش ہائی ٹیک فارم میکانائزیشن اسکیم پنجاب کے تحت منعقد کی گئی ہے۔ نمائش میں فیصل آباد ریجن سے ترقی پسند کسانوں کی کثیر تعداد نے بھرپور شرکت کی۔ کسانوں نے جدید مشینری میں گہری دلچسپی کا اظہار کیا اور ماہرین سے رہنمائی حاصل کی۔

اس موقع پر بینک آف پنجاب کے ریجنل ہیڈ اور ان کی ٹیم بھی موجود تھی تاکہ کسانوں کو مالی سہولیات اور قرضہ جات کے طریقہ کار سے آگاہ کیا جا سکے۔تقریب میں ایڈیشنل ڈائریکٹر جنرل ایگریکلچرل انجینئرنگ (فیصل آباد ریجن) انجینئر عمر علی رندھاوا،ڈائریکٹر ایگریکلچرل انجینئرنگ فیصل آباد ڈویژن انجینئر منظور احمد سیال، ڈائریکٹر ایگریکلچرل انجینئرنگ (ریسرچ) انجینئر مقصود احمد، ڈائریکٹر ایگریکلچرل انجینئرنگ (ٹیکنیکل) انجینئر قیصر محمود، ڈائریکٹر ایگریکلچرل انجینئرنگ (پلاننگ) انجینئر شاہد حسین، ڈائریکٹر سرگودھا ڈویژن فہیم، ڈپٹی ڈائریکٹر (مانیٹرنگ) انجینئر اسرار کاظم سمیت اضلاع جھنگ، ٹوبہ ٹیک سنگھ اور فیصل آباد کے ڈسٹرکٹ انجینئرز نے شرکت کی۔