کپاس کی پیداوار میں اضافہ حکومت کی ترجیحات میں شامل ہے، ڈائریکٹر جنرل زراعت توسیع پنجاب

پیر 16 مارچ 2026 19:52

ملتان (اُردو پوائنٹ اخبارتازہ ترین - اے پی پی۔ 16 مارچ2026ء) ڈائریکٹر جنرل زراعت توسیع پنجاب عبدالحمید نے کہا ہے کہ پنجاب میں کپاس کی پیداوار میں اضافہ حکومت کی ترجیحات میں شامل ہے اور اس مقصد کے حصول کے لیے محکمہ زراعت کا فیلڈ عملہ بھرپور محنت کرے۔ان خیالات کا اظہار انہوں نے پیر کو اپنے دورہ ملتان کے دوران یہاں کپاس کی اگیتی کاشت کی مہم کے حوالے سے منعقدہ جائزہ اجلاس میں گفتگو کرتے ہوئے کیا ۔

اجلاس میں ڈائریکٹر زراعت توسیع ملتان ڈویژن شہزاد صابر ، ڈپٹی ڈائریکٹر زراعت توسیع شاہد اقبال، اسسٹنٹ ڈائریکٹرز، زراعت افسران، کراپ انسپکٹرز اور دیگر فیلڈ عملہ نے شرکت کی۔ اس موقع پر اسسٹنٹ ڈائریکٹرز اور زراعت افسران نے اپنے اپنے علاقوں میں کپاس کے مقررہ اہداف اور اب تک کی پیش رفت کے حوالے سے بریفنگ دی۔

(جاری ہے)

ڈائریکٹر جنرل زراعت توسیع پنجاب چوہدری عبد الحمید نے معلومات اکٹھی کرنے کے طریقہ کار کے بارے میں دریافت کیا جس پر بتایا گیا کہ فیلڈ میں مرکز اور تحصیل کی سطح پر ڈیٹا مرتب کرکے ضلع کی سطح پر جمع کروا دیا جاتا ہے۔

انہوں نے فیلڈ عملہ کو ہدایت کی کہ کاشتکاروں کو اگیتی کپاس کی اہمیت اور فوائد سے مؤثر انداز میں آگاہ کیا جائے اور 31 مارچ تک کپاس کی اگیتی کاشت کے رقبہ کا 100 فیصد ہدف حاصل کرنے کے لیے تمام تر وسائل بروئے کار لائے جائیں۔ ڈائریکٹر جنرل زراعت توسیع پنجاب چوہدری عبدالحمید نے ضلع کی سطح پر مرتب شدہ معلومات کا تفصیلی جائزہ لیا اور ٹیلی فون کے ذریعے مختلف مقامات پر رابطہ کر کے اس کی تصدیق بھی کی۔

انہوں نے محکمانہ واٹس ایپ گروپس کو مزید فعال بنانے کی ہدایت کرتے ہوئے کہا کہ ان گروپس میں روزانہ کی بنیاد پر فصلوں سے متعلق رہنمائی، فیلڈ سرگرمیوں اور تازہ ہدایات کا تبادلہ کریں تاکہ معلومات بروقت تمام کاشتکاروں تک پہنچ سکیں اور کپاس کی کاشت کے اہداف مؤثر انداز میں حاصل کیے جا سکیں۔