سیالكوٹ،کاشتکاروں کو کھڑی گندم کی فصل گرنے کی صورت میں پوٹاش کا سپرے کرنے کی ہدایت

منگل 17 مارچ 2026 14:44

سیالكوٹ (اُردو پوائنٹ اخبارتازہ ترین - اے پی پی۔ 17 مارچ2026ء) اسسٹنٹ ڈائریکٹر محکمہ زراعت (توسیع) سمبڑیال ڈاکٹر افتخار حسین بھٹی نے کاشتکاروں کو کھڑی گندم کی فصل گرنے کی صورت میں پوٹاش کا سپرے کرنے کی ہدایت کی ہے۔

(جاری ہے)

انہوں نے کہا ہے کہ اگر کاشتکاروں نے گندم کو آخری پانی لگا رکھا تھا اور بارش و تیز ہوا چلنے سے بڑی تعداد میں کھڑی گندم نیچے گر چکی ہے ، ایسے حالات میں کاشتکار 2 پرسنٹ کلمی شورے کا سپرے کریں اس سے پوٹاش کی کمی بہتر ہوجاتی ہے، گندم کو تنے سے دانے تک خوراک جاری رہتی ہے جس سے دانہ کمزور نہیں ہوتا۔

انہوں نے کہا کہ فصل نیچے گرنے سے گندم کے دانے کمزور رہ جاتے ہیں جس سے پیداوار میں واضح کمی ہوجاتی ہے اور پوٹاش کا سپرے کرنے سے دانے کمزور نہیں ہوتے ۔ انہوں نے بتایا کہ جو گندم پکنے کے قریب ہے اس کو صرف قلمی شورہ کا ہی سپرے کریں اور جو پچھیتی کاشت ہیں اسے دو پرسنٹ یوریا کا بھی سپرے کریں۔ انہوں نے بتایا کہ مہنگے پوٹاش کے سپرے خریدنے سے بہتر ہے کہ قلمی شورہ کا سپرے کریں کیونکہ قلمی شورہ ہی پوٹاش کا سورس ہے یعنی اس سے ہی پوٹاش تیار کی جاتی ہے۔