پیسٹی سائیڈ ڈیلرز کے لائسنس کے لئے ٹریننگ لازمی قرار دیدی گئی

جمعرات 9 اپریل 2026 12:00

لاہور(اُردو پوائنٹ اخبارتازہ ترین - این این آئی۔ 09 اپریل2026ء) محکمہ زراعت نے پیسٹی سائیڈ ڈیلرز کی ٹریننگ کا آغاز کردیا ہے، تربیت کے بعد چودہ دن میں لائسنس کا اجراء کیا جائے گا ۔ پیسٹی سائیڈ ڈیلرز کے جدید لائسنس کے لئے تین دن جبکہ نئے پیسٹی سائیڈ ڈیلرز کی سات دن کی ٹریننگ ہوگی جبکہ لائسنس کے لئے ٹریننگ لازمی قرار دیدی گئی ہے ۔ پیسٹی سائیڈ ڈیلرز کی ٹریننگ ورکشاپس سے خطاب کرتے ہوئے ڈائریکٹر جنر ل پیسٹی سائیڈ محکمہ زراعت عامر رسول نے کہا کہ اس ٹریننگ کا مقصد شرکا ء کو بتانا ہے کہ وہ کس طرح زرعی ادویات کے سپرے کے دوران ماحو ل کو محفوظ بناسکتے ہیں۔

انسان کو زرعی زہروں کے اثر ات سے بچا نے کا طریق کار کیا ہے اورادویات کو محفو ظ کرنے کے لئے کیا اقدامات ضروری ہیں،ادویات کا ریکارڈ کس طرح مرتب کیا جاتا ہے،سپرے کے دوران احتیاطی تدابر کیاہیں اورسپرے کے دوران کسانوں کو زرعی ادویات سے کیسے محفوظ رکھا جاسکتا ہے۔

(جاری ہے)

انہوں نے کہا کہ زرعی ادویات رکھنے والے کو خود بھی محتاط رکھنے کا طریقہ کار کیا ہے،زرعی اجناس کے زرعی ادویات کے اثرات سے بچانا کس طرح ممکن ہے۔

زرعی ادویات کوصرف کیڑوں کو ختم کرنے محدود رکھنا کس طرح ممکن ہے۔ انہوں نے کہا کہ اس ورکشاپس میں شرکا ء کو بتایا جائے گاکہ کس طرح زرعی اددیات کا لیبل پڑھنا ہے،کس وقت سپرے کرنا ہے،سپرے کے دوران وقفہ کتنا رکھنا ہے،زائد المیعاد ادویات کو کیسے تلف کرنا ہے اورادویات کی رسیدوں کو محفوظ بنانے کا طریقہ کیا ہے،کیش رسیدکس طرح تیار کرنی ہے،زرعی ادویات کے لئے کونسے قوانین ہیں اورقانون شکنی کی سزایائیں کیاہیں۔عامر رسول نے کہا کہ ہمارا مقصد پیسٹی سائیڈ ڈیلرز میں شعور اجاگر کرنا ہے،ان ڈیلرز کو غیر ضروری سپرے کرنے سے بھی روکنا ہے،صرف ضروری سپرے ہی زرعی اجناس کی نشوونما کا باعث ہوتا ہے۔