سکھر چیمبر آف کامرس اینڈ انڈسٹری کے صدرکی زیرِ صدارت آئی ٹی کمیٹی کااجلاس

جمعہ 10 اپریل 2026 21:24

سکھر(اُردو پوائنٹ اخبارتازہ ترین - این این آئی۔ 10 اپریل2026ء) سکھر چیمبر آف کامرس اینڈ انڈسٹری کے صدر محمد خالد کاکیزئی کی زیرِ صدارت آئی ٹی کمیٹی کا ایک اہم اجلاس ایوان میں منعقد ہوا۔ اجلاس میں کمیٹی کے کنوینر سید آصف علی شاہ، ڈپٹی کنوینر محمد عمار شیخ، سیکریٹری جنرل محمد نعمان آرائیں نے شرکت کی۔ اجلاس میں حالیہ سائبر کرائم کے بڑھتے ہوئے واقعات پر تفصیلی غور و خوض کیا گیا اور اس سلسلے میں چیمبر کے اراکین ، کاروباری برادری اور شہریوں کو احتیاطی تدابیر اختیار کرنے کی تاکید کی گئی۔

شرکاء نے اس بات پر زور دیا کہ موجودہ دور میں آئی ٹی سیکٹر کی اہمیت بہت بڑھ چکی ہے، لہٰذا کاروباری برادری کو جدید ٹیکنالوجی کے ساتھ ہم آہنگ ہونا وقت کی اہم ضرورت ہے۔

(جاری ہے)

اجلاس میں آئی ٹی سیکٹر کو درپیش چیلنجز اور مستقبل کے مواقع پر بھی تفصیلی گفتگو کی گئی۔ اجلاس کے دوران سوشل میڈیا اور ڈیجیٹل فراڈ کے بڑھتے ہوئے واقعات پر تشویش کا اظہار کرتے ہوئے کسی بھی غیر مصدقہ (نان ویریفائڈ) ای میل یا لنک کو کھولنے سے گریز کرنے، مشکوک ایپلیکیشنز ڈاؤن لوڈ نہ کرنے، نامعلوم نمبرز سے آنے والی کالز اور پیغامات پر فوری ردعمل نہ دیئے جانے ، اپنا ATM پن، OTP ، پاس ورڈ یا دیگر حساس معلومات کسی کے ساتھ شیئر نہ کرنے ، ای میلز اور سوشل میڈیا پیغامات کو بغور پڑھ کر تصدیق کے بعد ہی کوئی اقدام کرنے کی ہدایات کیں۔

اجلاس میں اس بات پر بھی روشنی ڈالی گئی کہ واٹس ایپ، فیس بک، انسٹاگرام، ٹک ٹاک، ٹویٹر اور یوٹیوب جیسے سوشل میڈیا پلیٹ فارمز پر اکاؤنٹس ہیک ہونے کے واقعات میں اضافہ ہو رہا ہے، جس کے پیش نظر صارفین کو خصوصی احتیاط برتنے کی ضرورت ہے۔ آخر میں بزنس کمیونٹی اور عوام الناس کو تلقین کی گئی کہ وہ ڈیجیٹل پلیٹ فارمز کا استعمال ذمہ داری اور احتیاط کے ساتھ کریں تاکہ کسی بھی قسم کے مالی یا ذاتی نقصان سے محفوظ رہا جا سکے۔ اختتام پر اس عزم کا اظہار کیا گیا کہ سکھر چیمبر مستقبل میں بھی آئی ٹی آگاہی اور ڈیجیٹل سیکیورٹی کے حوالے سے ایسے اقدامات جاری رکھے گا تاکہ کاروباری برادری کو محفوظ اور جدید تقاضوں سے ہم آہنگ بنایا جا سکے۔