کاشتکاروں کو6 ارب روپے کا باردانہ مفت فراہم کیا جا رہا ہے، سید عاشق حسین

اتوار 19 اپریل 2026 20:04

لاہور (اُردو پوائنٹ اخبارتازہ ترین - اے پی پی۔ 19 اپریل2026ء) وزیرِ زراعت و لائیوسٹاک پنجاب سید عاشق حسین کرمانی نے صادق آباد اور رحیم یار خان کا دورہ کیا۔ترجمان کے مطابق اس موقع پر صادق آباد میں دائود ڈیری فارم پر منہ کھر بیماری کے خاتمہ کے لیے کمپارٹمنٹ کا باقاعدہ افتتاح کیا گیا۔ بعد ازاں بہاولپور ڈویژن میں محکمہ زراعت و لائیوسٹاک کے تحت جاری سرگرمیوں اور گندم خریداری مہم کے حوالے سے تفصیلی بریفنگ دی گئی۔

اجلاس میں چوہدری ارتضی دائود، ڈائریکٹر جنرلز زراعت پنجاب عبدالحمید، نوید عصمت کاہلوں، ڈائریکٹر جنرل لائیوسٹاک ڈاکٹر ندیم بدر، اسسٹنٹ کمشنر صادق آباد، عمران رسول، ڈائریکٹر زراعت توسیع محمد جمیل غوری سمیت محکمہ زراعت، لائیوسٹاک اور فوڈ کے افسران نے شرکت کی۔

(جاری ہے)

بریفنگ کے دوران بتایا گیا کہ صوبہ پنجاب کے 9 لاکھ کسان کارڈ ہولڈرز میں سے 1 لاکھ 27 ہزار کاشتکاروں کا تعلق بہاولپور ڈویژن سے ہے۔

اسی طرح صوبہ بھر میں قائم 233 گندم خریداری مراکز میں سے 34 مراکز بہاولپور ڈویژن میں فعال ہیں جبکہ ان مراکز پر اب تک 9 ہزار کاشتکاروں کی رجسٹریشن مکمل کی جا چکی ہے۔سید عاشق حسین کرمانی نے کہا کہ وزیراعلی پنجاب کی ہدایت پر کاشتکاروں کو6 ارب روپے مالیت کا باردانہ مفت فراہم کیا جا رہا ہے۔ انہوں نے بتایا کہ منہ کھر بیماری کے خاتمہ کے لیے صوبہ بھر میں قائم 8 کمپارٹمنٹس میں سے 3 رحیم یار خان میں قائم کیے گئے ہیں۔

انہوں نے کہا کہ دودھ اور گوشت کی پیداوار میں اضافہ اور ویلیو ایڈیشن کے فروغ کے لیے پرائیویٹ سیکٹر کو ہر ممکن سہولیات فراہم کی جا رہی ہیں۔ مزید برآں وزیراعلی پنجاب کے ویژن کے مطابق آم، کنو اور آلو کی ویلیو ایڈیشن کے لیے بھی پرائیویٹ سیکٹر کو خصوصی پیکج دیا جا رہا ہے۔