uجب میں چھوٹی تھی تو مجھے موت سے بہت ڈر لگتا تھا‘رومیسہ خان

جمعرات 4 جون 2026 18:30

,کراچی (اُردو پوائنٹ اخبارتازہ ترین - آن لائن۔ 04 جون2026ء) اداکارہ اور ڈیجیٹل کریئیٹر رومیسہ خان نے سوشل میڈیا پر موت کے خوف اور اپنے پیاروں کی قدر کرنے سے متعلق ایک جذباتی پیغام شیئر کیا جس نے صارفین کو جذباتی کر دیا۔رومیسہ خان نے انسٹاگرام پر ایک ویڈیو شیئر کی جس میں انہوں نے موت اور کسی قریبی عزیز کو کھو دینے کے بعد اس کے بارے میں اپنے بدلتے ہوئے نظریات پر گفتگو کی۔

ویڈیو میں رومیسہ نے کہا جب میں چھوٹی تھی تو مجھے موت سے بہت ڈر لگتا تھا۔ یہ دراصل نامعلوم چیز کا خوف تھا۔ میں سوچتی تھی کہ موت کیسی ہوگی، اس کا درد کیسا ہوگا اور میں بہت خوفزدہ ہوجاتی تھی۔انہوں نے مزید کہا لیکن جب آپ اپنے کسی بہت قریبی شخص کو کھو دیتے ہیں چاہے وہ والدین ہوں، بہن بھائی ہوں یا کوئی اور عزیز، اور آپ موت کو بہت قریب سے دیکھ لیتے ہیں تو پھر اس کا خوف ختم ہوجاتا ہے۔

(جاری ہے)

رومیسہ خان نے بتایا اب میرے لیے موت، موت نہیں رہی۔ یہ اب ایک ملاقات جیسی محسوس ہوتی ہے۔ ایسا لگتا ہے جیسے میں انہیں دوبارہ گلے لگا سکوں گی انہیں بتا سکوں گی کہ میں انہیں کتنا یاد کرتی ہوں اور ان سے کتنی محبت کرتی ہوں۔ اب موت مجھے خوفناک نہیں لگتی کیونکہ مجھے یقین ہے کہ وہاں کوئی میرا انتظار کر رہا ہے۔ویڈیو کے اختتام پر انہوں نے کہا اگر آپ نے بھی کسی اپنے کو کھویا ہے تو مجھے یقین ہے کہ آپ میری بات سمجھ سکتے ہیں۔

رومیسہ کی اس ویڈیو پر شوبز شخصیات اور مداحوں نے جذباتی ردِعمل کا اظہار کیا اور اپنے غم اور جدائی کے تجربات بھی شیئر کیے۔ بہت سے صارفین نے کہا کہ اپنے پیاروں کو کھونے کے بعد ان کے لیے بھی موت کا تصور بدل گیا ہے اور اب وہ اسے خوف کے بجائے ایک دوبارہ ملاقات کے طور پر دیکھتے ہیں۔