بریڈ پٹ اور انجلینا جولی کے بڑے بیٹے نے قانونی طور پر والد کا نام ہٹا دیا

ہالی ووڈ جوڑے کے 6 بچوں میں سے کم از کم 4 نے عوامی طور پر اپنے نام سے’’پٹ‘‘ہٹانے یا استعمال نہ کرنے کا فیصلہ کیا ہے

جمعہ 5 جون 2026 11:40

نیویارک (اُردو پوائنٹ اخبارتازہ ترین - این این آئی۔ 05 جون2026ء) ہالی ووڈ اداکارہ انجلینا جولی اور اداکار بریڈ پٹ کے بڑے بیٹے میڈوکس نے قانونی طور پر اپنے نام سے پٹ ہٹا دیا ہے اور اب وہ صرف میڈوکس جولی کے نام سے جانے جائیں گے۔رپورٹس کے مطابق میڈوکس نے مئی 2026 میں نام کی تبدیلی کے لیے قانونی دستاویزات جمع کروائیں۔ تاہم وہ اس سے پہلے بھی اپنے پیشہ ورانہ کاموں میں جولی استعمال کر رہے تھے۔

2024 کی فلم ماریہ میں انہیں میڈوکس جولی پٹ کے نام سے کریڈٹ دیا گیا تھا، جبکہ 2025 کی فلم (Couture)میں، جہاں وہ تھرڈ اسسٹنٹ ڈائریکٹر تھے، ان کا نام میڈوکس جولی درج کیا گیا۔اس سے قبل ان کے دیگر بہن بھائیوں نے بھی والد کے نام’’پٹ‘‘سے فاصلہ اختیار کیا، جس کے بعد میڈوکس اپنے چند بہن بھائیوں کے نقشِ قدم پر چلے ہیں۔

(جاری ہے)

ہالی ووڈ جوڑے کے 6 بچوں میں سے کم از کم 4 نے عوامی طور پر اپنے نام سے’’پٹ‘‘ہٹانے یا استعمال نہ کرنے کا فیصلہ کیا ہے۔

خیال رہے کہ بریڈ پٹ اور انجلینا جولی کی ملاقات 2003 میں فلم مسٹر اینڈ مسز اسمتھ کے سیٹ پر ہوئی تھی۔ دونوں نے 2014 میں شادی کی، تاہم 2016 میں جولی نے طلاق کی درخواست دائر کر دی۔طلاق اور بچوں کی تحویل سے متعلق قانونی کارروائیوں کے دوران جولی نے خاندان کے اندر کشیدگی اور بعض مبینہ ناخوشگوار واقعات کے الزامات عائد کیے، جن کی بریڈ پٹ نے تردید کی۔

بعد ازاں پٹ نے عوامی طور پر یہ بھی تسلیم کیا کہ انہوں نے شراب نوشی ترک کرنے کے لیے بحالی پروگرام میں شرکت کی تھی۔ناموں میں یہ تبدیلیاں اس بات کی نشاندہی کرتی ہیں کہ جولی اور پٹ کے بعض بچوں نے اپنی شناخت کو والدہ کے خاندانی نام کے ساتھ جوڑنے کو ترجیح دی ہے، تاہم خاندان کے افراد نے ان فیصلوں کی تمام تفصیلات عوامی طور پر بیان نہیں کیں۔