گلگت بلتستان اسمبلی کے انتخابات کا مرحلہ اختتام پذیر ،نتائج جمع کر کے حتمی شکل دینے پر کام جاری ہے، الیکشن کمشنر

حلقوں میں دوبارہ پولنگ کے احکامات جاری کئے ہیں ، 9پٹیشنز زیر سماعت ، نتائج کا14دن میں حتمی نوٹیفکیشن جاری کردیا جائیگا، راجہ شہباز خان

جمعہ 12 جون 2026 01:35

گلگت (اُردو پوائنٹ اخبارتازہ ترین - این این آئی۔ 12 جون2026ء) چیف الیکشن کمشنر گلگت بلتستان راجہ شہباز خان (تمغہ شجاعت)نے کہا ہے کہ گلگت بلتستان اسمبلی کے 2026ء کے انتخابات کا مرحلہ پرامن طریقے سے اختتام پذیر ہوگیا ،اب نتائج جمع کر کے حتمی شکل دینے پر کام جاری ہے ۔ جاری بیان میں راجہ شہباز نے کہا کہ پانچ حلقوں کا فارم 49 جاری ہوا ہے،جبکہ دیگر حلقوں میں انتخابی نتائج کو حتمی شکل دینے کیلئے کام چل رہا ہے۔

انہوں نے کہا کہ 5حلقوں میں دوبارہ پولنگ کے احکامات جاری کیے گئے ہیں۔

(جاری ہے)

الیکشن کمیشن گلگت بلتستان میں الیکشن کے حوالے سے 9پٹیشنز پر سماعت کی جا رہی ہے اب تک تین پٹیشن پر سماعت کی گئی ہے جبکہ دیگر پٹیشن کی سماعت جمعہ کے روز ہوگی اور اس مرحلے کو جلد مکمل کیا جائے گا۔چیف الیکشن کمشنر گلگت بلتستان نے واضح کیا کہ الیکشن ایکٹ کے سیکشن 98کے تحت پول ڈے سے 14دن کے اندر نتائج کا حتمی نوٹیفکیشن جاری کرنا ہے۔چیف الیکشن کمشنر نے کہا کہ جی بی اے 6ہنزہ،جی بی اے 11کھرمنگ ، جی بی اے 23گھانچھے ٹو اورجی بی اے 23گانچھے 3کا فارم 49مکمل ہوا ہے۔دور دراز علاقوں سے نتائج جمع کرنے اور حتمی شکل دینے میں وقت لگ رہا ہے تاہم قانون کے مطابق 14دن کے اندر حتمی نوٹیفکیشن جاری کر دیا جائے گا ۔