رکن الدین گرین ویلی متاثرین کا احتجاجی دھرنے کا اعلان، مطالبات منظور نہ ہونے پر جولائی میں احتجاج کی وارننگ

ہفتہ 13 جون 2026 16:57

کراچی (اُردو پوائنٹ اخبارتازہ ترین - این این آئی۔ 13 جون2026ء) رکن الدین گرین ویلی کے متاثرین نے خبردار کیا ہے کہ اگر جون 2026 کے اختتام تک انٹرنل ڈیولپمنٹ کے لیے واضح اور عملی منصوبہ، مکمل ٹائم لائن اور فوری لیزز جاری کرنے کا باضابطہ اعلان نہ کیا گیا تو جولائی 2026 میں ذمہ داران کی رہائش گاہوں کے سامنے پرامن احتجاجی دھرنا دیا جائے گا۔متاثرین کی جانب سے جاری اعلامیے میں کہا گیا ہے کہ وہ گزشتہ تقریبا بیس برس سے اپنے جائز حقوق، زمین اور بہتر مستقبل کے حصول کے لیے مسلسل انتظار اور ذہنی اذیت کا شکار ہیں۔

متاثرین کے مطابق انہوں نے اپنی جمع پونجی اس منصوبے میں اس امید کے ساتھ لگائی تھی کہ انہیں محفوظ رہائش اور بہتر زندگی میسر آئے گی، تاہم طویل عرصہ گزرنے کے باوجود انہیں عملی پیش رفت کے بجائے صرف وعدوں اور تاخیر کا سامنا کرنا پڑا۔

(جاری ہے)

متاثرین کے نمائندوں نے کہا کہ احتجاجی دھرنے کا اعلان کسی قسم کی دھمکی نہیں بلکہ مسلسل نظرانداز کیے جانے کے خلاف آئینی، جمہوری اور پرامن احتجاج کا فیصلہ ہے۔

ان کا کہنا تھا کہ متاثرین مزید غیر یقینی صورتحال برداشت کرنے کے لیے تیار نہیں اور اب عملی اقدامات کے منتظر ہیں۔اعلامیے میں حکومتِ سندھ، متعلقہ اداروں، قانون نافذ کرنے والے اداروں اور میڈیا سے مطالبہ کیا گیا کہ وہ اس دیرینہ مسئلے کا فوری نوٹس لیتے ہوئے متاثرین کو انصاف فراہم کریں اور ذمہ داران کو عملی اقدامات کا پابند بنائیں۔متاثرین نے خبردار کیا کہ اگر مقررہ مدت کے اندر پیش رفت نہ ہوئی تو احتجاجی تحریک کا دائرہ مزید وسیع کیا جائے گا۔متاثرین کے اہم مطالبات میں انٹرنل ڈیولپمنٹ کا عملی آغاز، مکمل تحریری ٹائم لائن، فوری لیزز کا اجرا اور قانونی حقوق کی فراہمی شامل ہیں۔