لائیو سٹاک کارڈ فیز ٹو سے مستفید ہونے کے لیے فیز ون کے واجبات فوری جمع کروائیں، ڈپٹی ڈائریکٹر لائیو سٹاک

اتوار 5 جولائی 2026 16:23

سرگودھا (اُردو پوائنٹ اخبارتازہ ترین - اے پی پی۔ 05 جولائی2026ء) ڈپٹی ڈائریکٹر محکمہ لائیو سٹاک سرگودھا ڈاکٹر نائلہ نے لائیو سٹاک کارڈ ہولڈر مویشی پال حضرات سے کہا ہے کہ لائیو سٹاک کارڈ فیز ٹو سے مستفید ہونے کے لیے فیز ون میں حاصل کردہ قرض کی رقم یا دیگر واجبات فوری طور پر اپنے بقایاجات بینک آف پنجاب کی متعلقہ برانچ میں جمع کروائیں۔انہوں نے کہا کہ حکومت پنجاب کی جانب سے لائیو سٹاک کارڈ فیز ٹو کے آغاز کی تیاریاں مکمل کی جا رہی ہیں اور صرف وہی کسان و مویشی پال حضرات اس سکیم کے لیے اہل ہوں گے جنہوں نے فیز ون کے تمام واجبات بروقت ادا کر دیے ہوں گے۔

نادہندگان کو نئی سکیم سے فائدہ اٹھانے کے لیے اپنے بقایاجات فوری جمع کروانے ہوں گے ۔ ڈپٹی ڈائریکٹر نے کہا کہ لائیو سٹاک کارڈ پروگرام کا مقصد مویشی پال حضرات کو چارہ، ونڈا، ویکسین اور دیگر ضروری اخراجات کے لیے آسان مالی سہولت فراہم کرنا ہے تاکہ دودھ اور گوشت کی پیداوار میں اضافہ ہو۔

(جاری ہے)

انہوں نے کہا کہ کسان اس موقع سے بھرپور فائدہ اٹھائیں اور مقررہ شرائط کے مطابق اپنی ادائیگیاں جلد مکمل کریں۔انہوں نے واضح کیا کہ نادہندہ فارمرز نہ صرف لائیو سٹاک کارڈ کی سہولت سے محروم رہیں گے بلکہ مستقبل کی دیگر مالی معاونت کی سکیموں میں بھی مشکلات کا سامنا کرنا پڑ سکتا ہے لہذا فوری اپنے ذمہ واجبات جمع کروا کر فیز ٹو کی سہولیات سے مستفید ہوں۔