مہران یونیورسٹی میں نئے تعلیمی بیچ 2026 کی تعارفی تقریب کا انعقاد

وائس چانسلر نے طلبہ کو یونیورسٹی کی سہولتوں، قواعد و ضوابط اور سماجی ذمہ داریوں سے آگاہ کیا

پیر 20 جولائی 2026 21:35

حیدرآباد(اُردو پوائنٹ اخبارتازہ ترین - این این آئی۔ 20 جولائی2026ء) مہران یونیورسٹی آف انجینئرنگ اینڈ ٹیکنالوجی، جامشورو میں نئے تعلیمی بیچ 2026 کے طلبہ و طالبات کے اعزاز میں تعارفی تقریب یونیورسٹی آڈیٹوریم میں منعقد ہوئی، جس میں یونیورسٹی انتظامیہ، اساتذہ اور بڑی تعداد میں نئے طلبہ نے شرکت کی۔تقریب سے خطاب کرتے ہوئے وائس چانسلر پروفیسر ڈاکٹر طحہ حسین علی نے طلبہ کو یونیورسٹی میں دستیاب اسکالرشپس، ہاسٹل، لائبریری، جمنازیم، کھیلوں اور دیگر تعلیمی سہولتوں کے بارے میں تفصیلی آگاہی دی۔

انہوں نے یونیورسٹی کے تدریسی نظام، قواعد و ضوابط اور تعلیمی طریقہ کار پر بھی روشنی ڈالی۔انہوں نے کہا کہ مہران یونیورسٹی ملک کی تیسری اور سندھ کی پہلی نمبر انجینئرنگ یونیورسٹی ہے اور یہ دنیا کے ان ممتاز اداروں میں شامل ہے جو واشنگٹن معاہدے کا حصہ ہیں۔

(جاری ہے)

ان کا کہنا تھا کہ یونیورسٹی سے ڈگری حاصل کرنے کے لیے طلبہ کو پسماندہ اور محروم علاقوں میں سماجی خدمات انجام دینا بھی لازمی ہوگا۔

وائس چانسلر نے نئے طلبہ کو مبارکباد دیتے ہوئے کہا کہ انہوں نے اپنی زندگی کے ایک اہم مرحلے کا آغاز ایک ایسے ادارے سے کیا ہے جو پیشہ ورانہ اور معیاری تعلیم فراہم کرتا ہے۔ انہوں نے امید ظاہر کی کہ یہی طلبہ مستقبل میں کامیاب انجینئر بن کر ملک و قوم کی خدمت کریں گے۔تقریب میں یونیورسٹی کے ڈینز، رجسٹرار پروفیسر ڈاکٹر نصراللہ پیرزادہ، مختلف تدریسی و انتظامی شعبوں کے سربراہان اور اساتذہ نے بھی شرکت کی۔