سفارت خانوں کا ڈیٹا ہیک کرنے والے 12ملزمان گرفتار

کارروائی کے دوران جعلی اپوائنٹمنٹ لیٹرز، موبائل فونز ،دیگر اہم ڈیجیٹل شواہد بھی برآمد

منگل 21 جولائی 2026 20:45

لاہور(اُردو پوائنٹ اخبارتازہ ترین - این این آئی۔ 21 جولائی2026ء) نیشنل سائبر کرائم انویسٹی گیشن ایجنسی نے سفارتخانوں کا ڈیٹا ہیک کرکے ویزا درخواست گزاروں سے فراڈ کرنے والے گروہ کے 12ملزمان کو گرفتار کرنے کا دعوی کیا ہے۔نجی ٹی وی کے مطابق لاہور میں میڈیا سے گفتگو کرتے ہوئے ڈائریکٹر این سی سی آئی اے علی وسیم نے بتایا کہ گرفتار ملزمان سفارتخانوں کے ڈیٹا تک رسائی حاصل کر رہے تھے۔

ملزمان نے مبینہ طور پر سفارتخانوں کے رابطہ نمبرز ہیک کرکے اپنے نمبرز پر ڈائیورٹ کر رکھے تھے جس کے ذریعے وہ ویزا اور اپوائنٹمنٹ کے خواہشمند افراد کو دھوکہ دیتے تھے۔علی وسیم کے مطابق این سی سی آئی اے نے کارروائی کے دوران جعلی اپوائنٹمنٹ لیٹرز، موبائل فونز اور دیگر اہم ڈیجیٹل شواہد بھی برآمد کیے ہیں۔

(جاری ہے)

انہوں نے بتایا کہ مختلف سفارتخانوں کی جانب سے شکایات اور رابطے کے بعد تحقیقات شروع کی گئیں جس کے نتیجے میں اس گروہ کا سراغ لگایا گیا۔

ڈائریکٹر این سی سی آئی اے کے مطابق گرفتار گروہ 2019ء سے سرگرم تھا اور ویزا ایکسٹینشن، اپوائنٹمنٹ لینے اور سفارتی خدمات کے خواہشمند افراد کو نشانہ بنا کر فراڈ کرتا تھا۔ملزمان نے جعلی ویب سائٹس اور سفارت خانوں جیسا ماحول بھی تیار کر رکھا تھا تاکہ شہریوں کو اصل اور جعلی نظام میں فرق محسوس نہ ہو سکے۔ انہوں نے کہا کہ ملزمان کے مزید ساتھیوں کی گرفتاری کے لیے کارروائیاں جاری ہیں جبکہ مبینہ طور پر استعمال ہونے والی ٹائیکون ٹو ایف اے نامی ہیکنگ ایپلیکیشن کے حوالے سے بھی تحقیقات کی جا رہی ہیں۔

علی وسیم نے مزید بتایا کہ کال سینٹرز کی نگرانی اور تحقیقات کے لیے تمام متعلقہ اداروں اور اسٹیک ہولڈرز پر مشتمل جوائنٹ ٹاسک فورس قائم کی جا رہی ہے تاکہ سائبر فراڈ کے بڑھتے ہوئے واقعات کی روک تھام کی جا سکے۔