فیس بک صارفین کے لیے خوشخبری، میٹا نے مفت ویری فکیشن بیج متعارف کرا دیا

18 سال یا زائد عمر کے اہل صارفین سیلفی کے ذریعے شناخت کی تصدیق کرا سکیں گے، تصدیقی بیج کے لیے کسی سبسکرپشن فیس کی ضرورت نہیں

ہفتہ 25 جولائی 2026 21:20

فیس بک صارفین کے لیے خوشخبری، میٹا نے مفت ویری فکیشن بیج متعارف کرا ..

کراچی(اُردو پوائنٹ اخبارتازہ ترین - این این آئی۔ 25 جولائی2026ء) سوشل میڈیا کمپنی میٹا نے فیس بک کے اہل صارفین کے لیے بغیر کسی ماہانہ یا سالانہ سبسکرپشن فیس کے مفت ویری فکیشن بیج (بلیو ٹک) حاصل کرنے کی نئی سہولت متعارف کرا دی ہے۔غیر ملکی خبر رساں ادارے کے مطابق میٹا نے فروری 2023 میں میٹا ویری فائیڈ کے نام سے بامعاوضہ سروس متعارف کرائی تھی، جس کے ذریعے صارفین نیلا تصدیقی بیج اور دیگر اضافی سہولیات حاصل کرتے تھے۔

تاہم کمپنی نے اب ایک نیا مفت ویری فکیشن نظام متعارف کرایا ہے، جس کا مقصد حقیقی صارفین کی شناخت کی تصدیق کرنا ہے۔میٹا کے مطابق اس پروگرام کے تحت صارفین کو صرف اپنی ایک سیلفی جمع کرانا ہوگی، جسے جدید فیشل ریکگنیشن ٹیکنالوجی کے ذریعے فیس بک پروفائل پر موجود تصاویر سے ملا کر شناخت کی تصدیق کی جائے گی۔

(جاری ہے)

کمپنی کا کہنا ہے کہ یہ عمل چند ہی منٹوں میں مکمل ہو جائے گا۔

اعلامیے کے مطابق یہ سہولت صرف 18 سال یا اس سے زائد عمر کے اہل صارفین کے لیے دستیاب ہوگی۔ کامیاب تصدیق کے بعد صارف کے پروفائل پر ویری فکیشن بیج ظاہر ہوگا، جو فیس بک کی مختلف سروسز پر بھی نمایاں رہے گا۔میٹا نے واضح کیا ہے کہ یہ مفت ویری فکیشن بیج صرف اس بات کی تصدیق کرے گا کہ متعلقہ اکاؤنٹ کسی حقیقی شخص کا ہے۔ یہ بیج کسی صارف کی شہرت، سماجی حیثیت یا پیشہ ورانہ ساکھ کی تصدیق نہیں کرے گا بلکہ اس کا مقصد صرف شناخت کی توثیق کرنا ہے۔کمپنی کے مطابق تمام اہل فیس بک صارفین، جو مقررہ تصدیقی عمل کامیابی سے مکمل کریں گے، اس مفت ویری فکیشن بیج کے حصول کے اہل ہوں گے۔