یونیورسٹی آف سرگودھا میں قائم لنکن کارنر کے زیر اہتمام منعقدہ چار ہفتوں پر محیط فریڈم 250 انوویشن بوٹ کیمپ اختتام پزیر

جمعہ 7 اگست 2026 22:42

سرگودھا (اُردو پوائنٹ اخبارتازہ ترین - اے پی پی۔ 07 اگست2026ء) یونیورسٹی آف سرگودھا میں قائم لنکن کارنر کے زیرِ اہتمام منعقدہ چار ہفتوں پر محیط فریڈم 250 انوویشن بوٹ کیمپ اختتام پزیر ہوگیا۔ اختتامی تقریب میں تربیت مکمل کرنے والے بچوں میں اسناد تقسیم کی گئیں جبکہ بوٹ کیمپ کے دوران تیار کیے گئے منفرد منصوبوں کی نمائش بھی پیش کی گئی۔بوٹ کیمپ دو مراحل پر مشتمل تھا جس کے پہلے مرحلے میں کم عمر بچوں جبکہ دوسرے مرحلے میں 18 سے 24 سال عمر کے نوجوانوں کو تخلیقی سوچ، انفرادیت و جدت، مسئلہ حل کرنے کی صلاحیت اور عملی منصوبہ سازی سے متعلق تربیت فراہم کی گئی۔

اختتامی تقریب کے مہمانِ خصوصی پرو وائس چانسلر یونیورسٹی آف سرگودھا پروفیسر ڈاکٹر مسعود سرور اعوان تھے جبکہ لنکن کارنر کے فوکل پرسن پروفیسر ڈاکٹر اعجاز اصغر بھٹی بھی اس موقع پر موجود تھے۔

(جاری ہے)

پروفیسر ڈاکٹر مسعود سرور اعوان نے بچوں کے تیار کردہ منصوبوں کا جائزہ لیتے ہوئے ان کی تخلیقی صلاحیتوں، جدت پر مبنی سوچ اور بھرپور دلچسپی کو سراہا۔

انہوں نے کہا کہ اس نوعیت کے تربیتی پروگرام نوجوانوں میں قائدانہ صلاحیتوں، تخلیقی فکر اورعملی مہارتوں کوفروغ دیتے ہیں جو انہیں مستقبل کے چیلنجز سے نمٹنے اور معاشرے میں مثبت کردار ادا کرنے کے لیے تیار کرتے ہیں۔پروفیسر ڈاکٹر اعجاز اصغر بھٹی نے کہا کہ لنکن کارنر نوجوانوں کو سیکھنے ،جدت اور باہمی تعاون کے مواقع فراہم کرنے کے لیے مختلف تعلیمی اور تربیتی سرگرمیوں کا تسلسل سے انعقاد کر رہا ہے تاکہ انہیں جدید تقاضوں سے ہم آہنگ مہارتیں فراہم کی جا سکیں۔

تقریب کے اختتام پر فریڈم 250 انوویشن بوٹ کیمپ کامیابی سے مکمل کرنے والے شرکاء میں اسناد تقسیم کی گئیں جبکہ بوٹ کیمپ کی منصوبہ بندی، انتظام اور کامیاب انعقاد میں نمایاں کردار ادا کرنے والے فرینڈز آف دی کارنرکو تعریفی اسناد سے بھی نوازا گیا۔

Facebook Twitter Google + Share on Whatsapp

یونیورسٹی آف سرگودھا میں قائم لنکن کارنر کے زیر اہتمام منعقدہ چار ہفتوں پر محیط فریڈم 250 انوویشن بوٹ کیمپ اختتام پزیر

متعلقہ عنوان :

مزید تعلیم کی خبریں