آر پی او فیصل آباد نے 2 پولیس افسران کو نوکری سے برخاست کردیا

جمعہ 21 اگست 2026 23:08

فیصل آباد (اُردو پوائنٹ اخبارتازہ ترین - اے پی پی۔ 21 اگست2026ء) آر پی او فیصل آباد نے 2 پولیس افسران کو نوکری سے برخاست کردیا۔ناقص تفتیش اور اختیارات سے تجاوز کرنے پر محکمانہ کارروائی عمل میں لائی گئی۔ پولیس حکام نے بتایا کہ آر پی او فیصل آباد سہیل اختر سکھیرا کی جانب سے پولیس افسران و اہلکاروں کے خلاف خود احتسابی کا عمل جاری ہے۔ آر پی او نے ایس ایچ او تھانہ صدر جھنگ انسپکٹر حافظ عبداللہ جپہ کے خلاف ناقص تفتیش اور اختیارات سے تجاوز کرنے پر محکمانہ کارروائی عمل میں لاتے ہوئے انہیں انسپکٹر کے عہدے سے سب انسپکٹر کے عہدے پر تنزلی کے بعد ملازمت سے برخاست کر دیا ۔

اسی طرح تھانہ صدر جھنگ کے اسسٹنٹ سب انسپکٹر غلام رسول کو بھی اختیارات سے تجاوز کرنے پر محکمانہ کارروائی کے نتیجے میں ملازمت سے برخاست کر دیا گیا۔

(جاری ہے)

اس حوالے سے اپنے بیان میں آر پی او نے کہا کہ کرپٹ، نااہل اور غفلت و لاپرواہی کا مظاہرہ کرنے والے پولیس افسران و اہلکاروں کی محکمہ پولیس میں کوئی جگہ نہیں۔ فرض شناس اور دیانتدار افسران و اہلکاروں کی حوصلہ افزائی کی جائے گی جبکہ کرپٹ عناصر کے خلاف خود احتسابی کا عمل بلاامتیاز جاری رہے گا۔

انہوں نے کہا کہ فرض شناسی اور دیانتداری ہی پولیس افسران کے معیار کا بنیادی اصول ہے، کرپشن اور اختیارات کے ناجائز استعمال کے خلاف زیرو ٹالرنس پالیسی پر سختی سے عملدرآمد جاری ہے۔آر پی او نے مزید کہا کہ محکمانہ نظم و ضبط کو یقینی بنانے کے لیے بلاامتیاز کارروائیاں مستقبل میں بھی جاری رہیں گی۔ عوام کے جان و مال کے تحفظ میں کسی قسم کی کوتاہی، غفلت یا لاپرواہی ہرگز برداشت نہیں کی جائے گی۔