چیئرمین ڈیڈک ایبٹ آباد نے بانڈہ صاحب خان تا کوکل برسین سڑک کی تعمیر نو کے منصوبہ کا سنگِ بنیاد رکھ دیا

پیر 24 اگست 2026 23:08

ایبٹ آباد (اُردو پوائنٹ اخبارتازہ ترین - اے پی پی۔ 24 اگست2026ء) چیئرمین ڈیڈک ایبٹ آباد و رکن صوبائی اسمبلی افتخار احمد خان نے رکن قومی اسمبلی علی اصغر خان کے ہمراہ اپنے حلقہ نیابت پی کے 44 میں بانڈہ صاحب خان تا کوکل برسین سڑک کی تعمیر نو کے منصوبہ کا سنگِ بنیاد رکھ دیا۔ 53 کروڑ روپے کی لاگت کے اس منصوبہ کی تکمیل سے بانڈہ صاحب خان، بانڈی قاضیاں، رحمان آباد، دوھوبیاں، برسین، کوکل اور گجل کے علاقوں کے رہائشی آمد و رفت کی بہترین سہولت سے مستفید ہوں گے۔

اس سلسلے میں پیر کےروز تکیہ برسین کے مقام تقریب کا انعقاد کیا گیا۔ تقریب سے خطاب کرتے ہوئے چیئرمین ڈیڈک افتخار احمد خان نے کہا کہ حلقہ میں پسماندگی کے خاتمہ اور عوام کو بہتر سفری سہولیات کی فراہمی سمیت بنیادی سہولتیں فراہم کرنا ان کی ترجیحات میں شامل ہے۔

(جاری ہے)

بانڈہ صاحب خان تا کوکل روڈ کی بہتری یہاں کے رہائشیوں کی دیرینہ خواہش تھی جو کہ آج پوری ہوگئی۔

چیئرمین ڈیڈک افتخار احمد خان نے کہا کہ شہریوں کے معیارِ زندگی کو بلند کرنے کے مزید منصوبوں پر کام جاری ہے جو کہ جلد پایہِ تکمیل کو پہنچیں گے۔ ترقی کا یہ سفر آئندہ بھی اسی سرعت سے جاری رہے گا۔ ممبر قومی اسمبلی علی اصغر خان نے تقریب سے خطاب کرتے ہوئے کہا کہ حلقہ کے عوام کے مسائل ترجیحی بنیادوں پر حل کیے جائیں گے۔ اس سے قبل چیئرمین ڈیڈک و ایم پی اے افتخار احمد خان اور ایم این اے علی اصغر خان نے بانڈہ صاحب خان کے مقام پر سڑک کی تعمیر نو کے منصوبہ کی تختی کی نقاب کشائی بھی کی۔