صحت کیلئے مشورے ڈاکٹرز سے نہیں، اے آئی سے لیتی ہوں، ہالی ووڈ اداکارہ ہیلن میرن

منگل 15 ستمبر 2026 22:36

نیویارک (اُردو پوائنٹ اخبارتازہ ترین - آن لائن۔ 15 ستمبر2026ء) 81 سالہ معروف ہالی ووڈ اداکارہ ہیلن میرن نے انکشاف کیا ہے کہ میں صحت سے متعلق مشورہ لینے کے لیے ڈاکٹرز کے پاس جانے کے بجائے مصنوعی ذہانت (اے آئی) سے مدد لیتی ہوں۔ہیلن میرن نے ٹورنٹو انٹرنیشنل فلم فیسٹیول کے دوران اپنی نئی فلم ’اے ٹیلنٹ فار مرڈر‘ کے پروموشنل ایونٹ کے دوران اپنے انٹرویو میں بتایا کہ میں صحت کے معاملے میں اپنے ساتھی اداکاروں کے برعکس بہت کم فکر مند رہتی ہوں۔

انہوں نے بتایا کہ میں ڈاکٹرز کے پاس جانے سے مکمل طور پر گریز کرتی ہوں اور جب صحت سے متعلق کوئی سوال پوچھنا ہو تو اے آئی سے مدد لے لیتی ہوں۔ادکارہ نے اے آئی کو حیرت انگیز قرار دیتے ہوئے کہا کہ اے آئی صحت سے متعلق معمولی مسائل کے بارے میں معلومات فراہم کرنے میں مددگار ہے۔

(جاری ہے)

انہوں نے اپنی صحت برقرار رکھنے کے لیے متوازن غذا اور ورزش کو بھی اہم قرار دیا۔

ہیلن میرن نے یہ بھی بتایا کہ میں نے کینیڈین ایئر فورس کی’ایکس بی ایکس‘ ورزش کا معمول تقریباً 60 برس سے اپنایا ہوا ہے، جس میں روزانہ تقریباً 12 منٹ لگتے ہیں۔واضح رہے کہ طبی ماہرین عمومی طور پر صحت سے متعلق اہم یا سنگین مسائل میں اے آئی کو ڈاکٹر کا متبادل سمجھنے کے بجائے اسے صرف معلوماتی معاون کے طور پر استعمال کرنے کا مشورہ دیتے ہیں کیونکہ اے آئی کی جانب سے فراہم کردہ معلومات میں غلطی کا امکان موجود رہتا ہے۔