دبئی سے آنے والے کنٹینر سے لاکھوں روپے مالیت کی غیرملکی شراب اور بیئر پکڑی گئی

کنٹینر دبئی سے لاہور بھیجا گیا جس میں بظاہر پیپر رولز درآمد کیے جا رہے تھے، تلاشی پر اندر سے 12 ہزار 600 شراب کی بوتلیں، 11 ہزار سے زائد بیئر کے ٹن نکلے، شپمنٹ پر نام پتہ شاہ عالم مارکیٹ لاہور کا درج تھا

ساجد علی منگل 29 ستمبر 2026 15:34

دبئی سے آنے والے کنٹینر سے لاکھوں روپے مالیت کی غیرملکی شراب اور بیئر ..

کراچی (اُردو پوائنٹ اخبارتازہ ترین۔ 29 ستمبر 2026ء) اینٹی نارکوٹکس فورس (اے این ایف) نے کراچی میں پورٹ قاسم پر قاسم انٹرنیشنل کنٹینر ٹرمینل پر کامیاب کارروائی کرتے ہوئے دبئی سے آنے والے مشتبہ کنٹینر سے بھاری مقدار میں غیر ملکی شراب اور بیئر برآمد کر کے اسمگلنگ کی بڑی کوشش ناکام بنا دی۔

میڈیا رپورٹس میں اے این ایف ذرائع کے مطابق یہ مشتبہ کنٹینر دبئی سے لاہور کے لیے روانہ کیا گیا تھا، جس کی کسٹم و دیگر دستاویزات میں ظاہر کیا گیا تھا کہ اس میں مس پرنٹڈ پیپر رولز درآمد کیے جا رہے ہیں، تاہم اے این ایف نے پاس شدہ کارگو کو مشکوک جان کر کنٹینر کو فوری طور پر ہولڈ کرلیا اور اس کی مکمل و باریک بینی سے تلاشی لی، جس کے نتیجے میں کاغذ کے رولز کی آڑ میں چھپائی گئی ہزاروں کی تعداد میں اعلیٰ برانڈز کی غیر ملکی شراب کی بوتلیں اور بیئر کے کینز برآمد ہو گئے۔

(جاری ہے)

برآمد شدہ برانڈڈ اشیاء کی تفصیلات بتاتے ہوئے حکام نے بتایا کہ کنٹینر سے مختلف برانڈز کی مجموعی طور پر 12 ہزار 600 غیر ملکی شراب کی بوتلیں جس میں ایک کھیپ 6 ہزار 720 اور دوسری 5 ہزار 880 بوتلوں پر مشتمل تھی جبکہ 11 ہزار 40 بیئر کے کینز برآمد ہوئے ہیں، اس بین الاقوامی کارگو کا ایکسپورٹر دبئی کا ’طریق الجزیرہ جنرل ٹریڈنگ ایل ایل سی‘ ہے۔

بتایا گیا ہے کہ اس کھیپ کا کنسائنی یعنی یہ مال وصول کرنے والے کی شناخت لاہور کی شاہ عالم مارکیٹ کے ’کنگ میکر انٹرپرائزز‘ نامی ادارے کے طور پر ہوئی ہے، واقعے کے بعد اے این ایف تھانہ کلفٹن میں باقاعدہ مقدمہ درج کر لیا گیا ہے اور اس اسمگلنگ میں ملوث مرکزی ملزمان کی گرفتاری کے لیے مختلف شہروں میں چھاپے مارے جا رہے ہیں۔