:مردان:طلباء میں تحقیقی صلاحیتوں کو پروان چڑھانا اساتذہ کا بنیادی کام ہے، سیکرٹری ابتدائی و ثانوی تعلیم خیبرپختونخوا

ٴپشاور(اُردو پوائنٹ اخبارتازہ ترین - آن لائن۔ 16 مئی2024ء) فضل حق کالج مردان میں سالانہ تقریب تقسیم انعامات، تقریب کے مہمان خصوصی سیکرٹری ابتدائی و ثانوی تعلیم خیبرپختونخوا مسعود احمد تھے،تقریب میں مردان بورڈ کے چیئرمین فرید خٹک نے بطور گیسٹ آف آنر شرکت کی۔ اس موقع پر سیکرٹری ابتدائی و ثانوی تعلیم خیبرپختونخوا مسعود احمد نے نمایاں پوزیشن لینے والے طلباء اور طالبات میں انعامات تقسیم کیے۔

(جاری ہے)

اور اپنے خطاب میں انہوں نے فضل حق کالج کی نمایاں پیشرفت اور کامیابیوں کو سراہتے ہوئے اس کی حیثیت کو خطے میں تعلیمی فضیلت کی علامت قرار دیا۔ انہوں نے معیاری تعلیم کے مقصد کو آگے بڑھانے اور سیکھنے اور اختراع کے کلچر کو فروغ دینے میں ماہرین تعلیم، طلباء، والدین اور کمیونٹیز کی مشترکہ کوششوں کو سراہا۔ مسعود احمد نے طلباء میں تحقیقی سوچ کی صلاحیتوں کو پروان چڑھانے کی بنیادی اہمیت پر بھی زور دیا اور انہیں ان کے تعلیمی سفر اور مستقبل کی کامیابی کے لیے بنیادی حیثیت سے تسلیم کیا۔ مزید برآں انہوں نے کالج کی پرنسپل میڈم ثمینہ خان کی دل کی گہرائیوں سے تعریف کی اور ادارے کی کامیابی کو تشکیل دینے میں ان کی غیر متزلزل لگن اور محنت کا اعتراف کیا۔