خیبرپختونخوا،گندم کی خریداری مہم کے بند ہونے کا خدشہ

اتوار 26 مئی 2024 17:50

پشاور (اُردو پوائنٹ اخبارتازہ ترین - این این آئی۔ 26 مئی2024ء) خیبر پختون خوا میں 7 مئی سے جاری گندم کی خریداری مہم کے بند ہونے کا خدشہ ہے۔محکمہ خوراک نے سیکیورٹی کے لیے ایڈیشنل چیف سیکریٹری داخلہ کو خط لکھا دیا۔محکمہ خوراک کے مطابق بعض ڈیلرز ایس او پیز کے برعکس گندم خریدنے کے لیے دبا ڈال رہے ہیں، واضح کردہ ایس او پیز کے خلاف کسی سے گندم نہیں خرید سکتے۔

خط کے متن کے مطابق گندم خریداری مہم کے دوران سیکیورٹی دی جائے۔محکمہ خوراک کی درخواست پر محکمہ داخلہ نے سیکیورٹی کے لیے آئی جی کو مراسلہ بھیج دیا۔محکمہ داخلہ نے کہا کہ محکمہ خوراک کی محدود گندم خریداری کی مہم جاری ہے، محکمہ خوراک کے حکام کو ضروری سیکیورٹی فراہم کی جائے۔ذرائع کے مطابق چند عناصر گندم کی خریداری مہم کو بند کرانا چاہتے ہیں، ڈی آئی خان اور ایبٹ آباد میں گوداموں پر مقامی لوگوں نے کئی بار حملے کیے، سیکیورٹی نہ ہونے سے افسران گوداموں کی چیکنگ تک نہیں کر سکتے۔

(جاری ہے)

اس حوالے سے سیکریٹری خوراک ظریف آلمانی نے بتایا کہ سیکیورٹی مسائل کا سامنا ہے، حکومت کو خط لکھ دیا ہے، آنے والے چند دنوں کے دوران سیکیورٹی مل جائے گی۔ظریف آلمانی نے کہا کہ گندم خریداری مہم شفاف طریقے سے جاری ہے، کسی کے دبا پر گندم خریداری مہم بند نہیں کریں گے۔