فواد سے میرا کوئی مقابلہ نہیں، علی ظفر،

لاہور(اُردو پوائنٹ اخبار تازہ ترین۔10اکتوبر 2014ء) خوبصورت' کی ریلیز کے بعد بولی وڈ کے نئے فیورٹ پن اپ بوائے فواد خان کو کافی توجہ اور محبت ملی ہے۔اپنے ایک انٹرویو میں علی ظفرنے کہا کہ پاکستانی اداکار فواد خان ان کے بہت اچھے دوست ہیں اور فواد سے ان کا کوئی مقابلہ نہیں ہے۔فواد خان نے بہت خوبصورتی سے ہندوستان کی فلم انڈسٹری میں اپنی جگہ بنائی ہے لیکن میں چاہتا ہوں کہ مزید پاکستانی اداکار بھارت آکر کام کریں تاکہ دونوں ممالک کے اداکار ایک ساتھ اپنے فن کا مظاہرہ کر سکیں اور ایک دوسرے کو سمجھ سکیں۔

پاکستان کے ڈیشنگ ہیرو فواد خان انڈیا میں ایک سپر اسٹار کی طرح ابھر رہے ہیں، وہ مختلف مقبول ترین ٹی وی شوز میں فلم خوبصورت کی پروموشن کے لیے شرکت کر چکے ہیں جبکہ سونم کپور کے ہمراہ وہ ایک صف اول کے فیشن میگزین کی زینت بھی بن چکے ہیں۔

(جاری ہے)

دونوں نے اپنا شوبز کریئر بطور سنگر شروع کیا اور بعد میں ایکٹنگ کو اپنایا، سپرہٹ فلم خدا کے لئے میں جو رول فواد خان نے کیا وہ پہلے علی ظفر کو آفر کیا گیا تھا۔

علی ظفر کی فلمیں تیرے بن لادن اور میرے برادر کی دلہن بولی وڈ کی میگا ہٹس میں شامل ہیں، اس کے علاوہ وہ لندن پیرس نیو یارک، چشم بدور اور ٹوٹل سیاپا میں بھی اداکاری کے جوہر دکھا چکے ہیں۔اب علی یش راج فلمز کی نئی تخلیق کل دل میں نظر آئیں گے، جس میں وہ پرینیتی چوپڑہ کے مقابل ہیرو کا کردار نبھا رہے ہیں۔ فلم کی دیگر کاسٹ میں شامل ہیں رنویرسنگھ اور گووندا۔اس کے علاوہ علی ظفر 9 اکتوبر کو بولی وڈ کے پہلے باکس آفس ایوارڈز کی میزبانی کریں گے، جو اسٹار پلس اور باکس آفس انڈیا میگزین کے اشتراک سے منعقد کیا جا رہا ہے اور جس کا مقصد ہندی فلموں کی کامیابیوں کے ساتھ ساتھ ڈائریکٹرز اور اداکاروں کو بھی خراج تحسین پیش کرنا ہے۔