فلم کا خطرناک سین حقیقی سانحے میں تبدیل، اسٹنٹ مین موہن راج زندگی کی بازی ہار گیا

نئی دہلی (اُردو پوائنٹ اخبارتازہ ترین - این این آئی۔ 14 جولائی2025ء)بھارت کے 52 سالہ معروف اسٹنٹ آرٹسٹ ایس ایم راجو عرف موہن راج فلم ویٹووم کی شوٹنگ کے دوران ایک خطرناک کار اسٹنٹ کرتے ہوئے زندگی کی بازی ہار گئے۔ میڈیارپورٹس کے مطابق حادثہ اس وقت پیش آیا جب وہ ایک کار ٹاپلنگ (پلٹنی)کا سین انجام دے رہے تھے، ویڈیو کے مطابق گاڑی تیز رفتاری سے جا رہی تھی اور پھر الٹ گئی، سیٹ پر موجود ٹیم فوری طور پر انہیں گاڑی سے نکال کر اسپتال لے گئی، تاہم ڈاکٹروں نے انہیں مردہ قرار دے دیا۔

یہ واقعہ ناگاپٹنم کے ویزھنڈہماوادی گائوں میں پیش آیا جہاں فلم کی شوٹنگ جاری تھی۔ ذرائع کے حوالے سے بتایا گیا کہ اسٹنٹ مین شوٹنگ سے قبل سینے میں درد کی شکایت بھی کر چکے تھے۔معروف اداکار وشال نے ایک جذباتی پوسٹ میں لکھا کہ یہ بات ہضم کرنا مشکل ہے کہ میرے پرانے ساتھی اسٹنٹ آرٹسٹ راجو اس دنیا سے چلے گئے، انہوں نے میری کئی فلموں میں خطرناک اسٹنٹس کیے تھے، وہ واقعی بہادر انسان تھے، میں صرف ٹوئٹ تک محدود نہیں رہوں گا بلکہ ان کے خاندان کا مستقبل سنوارنے میں اپنا کردار ادا کروں گا۔

(جاری ہے)

اسٹنٹ کوریوگرافر سلوا نے بھی انسٹاگرام پر پوسٹ کرتے ہوئے کہا ہماری انڈسٹری کے عظیم اسٹنٹ مین، خاص طور پر کار جمپنگ میں ماہر ایس ایم راجو آج ہم سے بچھڑ گئے، ان کی کمی ہمیشہ محسوس کی جائے گی۔