دیہی علاقوں کی ڈسپنسریوں میں کوالیفائیڈڈاکٹرمتعین اورادویات فراہم کرنے کامطالبہ

ترلائی اسلام آباد(اُردو پوائنٹ تازہ ترین۔ 27اکتوبر 2008 ء) اسلام آباد کے شہری اوردیہی علاقوں سے تعلق رکھنے والے عوامی سماجی حلقوں نے وزارت صحت کے اعلیٰ حکام سے مطالبہ کیا ہے کہ دیہی سیول ڈسپنسریوں میں کوالیفائیڈ ڈاکٹر اور سٹاف تعینات کیا جائے ادویات کی کمی دور کی جائے فیڈرل گورنمنٹ ہسپتال میں مریضوں کی تعداد کے مطابق ڈاکٹروں اور جدید مشینری کی تعداد میں اضافہ کیاجائے صحافیوں سے بات چیت کرتے ہوئے میاں رضوان طارق ،ڈاکٹر محمد طارق شیخ، محمد ارشاد، جاوید اقبال،حبیب اللہ خان ،ایم ایس قادری اوردیگر معززین نے بتایا کہ اسلام آباد کی دیہی آبادیوں میں قائم سیول ڈسپنسریوں میں کوالیفائیڈ ڈاکٹر اور نرسنگ سٹاف موجود نہ ہونے اورادویات کے فقدان کے باعث لوگوں کو مقامی سطح پر علاج ومعالجہ کی سہولت میسر نہ ہے جبکہ مجبوری اورایمرجنسی میں فیڈرل ہسپتال اسلام آباد پولی کلینک میں سے علاج کرانے والوں کو بھی مختلف دشواریوں سے گزرنا پڑتا ہے ایمرجنسی سٹاف اورالٹراساؤنڈ لیبارٹری شیٹ مشینری پرتعینات ملازمین کا حاکمانہ رویہ افسوسناک ہوتا ہے الٹراساؤنڈ ٹیسٹ رپورٹ کیلئے بھی تاریخیں دے دی جاتی ہیں مشینری کی تعداد کم ہونے اورملازمین کی لاپرواہی غفلت کی بناء پر مریض اپنی باری کے انتظار میں پورا دن گزاردیتے ہیں جبکہ بروقت رپورٹس کی تیاری نہ ہونے سے متعلقہ مریضوں کے متعلقہ ڈاکٹر چھٹی کرچکے ہوتے ہیں جس سے دیہی علاقوں سے آئے ہوئے مریضوں کو سفری تکالیف کے ساتھ وقت اور سرمائے کے ضیاع کاسامنا کرنا پڑتا ہے جبکہ غریب مریضوں کیلئے آئے روز ہسپتالوں کے چکر لگانا قوت برداشت سے بالاہورہا ہے اور پرائیویٹ سطح پر علاج کرانا بھی ناممکن ہے عوامی حلقوں نے حکومت سے اپیل کی ہے کہ سرکاری سطح پر عوام کو علاج معالجہ کی مطلوبہ سہولیات کی فراہمی کیلئے اقدامات کیے جائیں اور عوامی تکالیف کاازالہ کیاجائے۔