تحصیل ہیڈ کوارٹر ہسپتال وزیرآباد کی اپ گریڈیشن، حکومت پنجاب نے 14 کروڑ روپے کے فنڈ جاری کردیئے

وزیرآباد(اُردو پوائنٹ اخبار تازہ ترین۔20نومبر 2014ء) تحصیل ہیڈ کوارٹر ہسپتال وزیرآباد کی اپ گریڈیشن کے لئے حکومت پنجاب نے 14 کروڑ روپے کے فنڈ جاری کردیئے۔محکمہ بلڈنگ نے تعمیر کا آغاز کر دیا۔ مٹی کے نمونے حاصل کر لئے گئے۔نئی تعمیرات تین منزلہ ہو نگی۔ٹراما سنٹر اور گائنی بلاک کا رقبہ 18ہزار مربع فٹ پر مشتمل ہے۔ موجودہ بلڈنگ کا آدھا حصہ مسمار کر کے ایڈمن بلاک اور آؤٹ ڈور کے شعبے تعمیر ہونگے۔

تفصیلات کے مطابق تحصیل ہیڈ کوارٹر ہسپتال کی اپ گریڈیشن کے حتمی فیصلے کے بعد ایک تین منزلہ ٹراما سنٹراورچار وارڈ پر مشتمل گائنی بلاک تعمیر ہونگے جن کا مجموعی رقبہ 18ہزار مربع فٹ(70مرلہ) پر مشتمل ہے جن پر 10کروڑ روپے لاگت آئے گی۔دونوں شعبے موجودہ کینٹین کی جگہ پر تعمیر ہو نگے۔

(جاری ہے)

ہسپتال کی موجودہ بلڈنگ کی جگہ دو منزلہ ایڈمن بلاک اور آؤٹ ڈور وارڈ تعمیر ہونگے جن پر 3کروڑ 74لاکھ روپے لاگت آئے گی۔

ٹراما سنٹر تین منزلہ ہو گا جس کے گراؤنڈ فلور پر ڈاکٹروں کے کمرے، ایکسرے روم، سی ٹی سکین روم، ٹیسٹ لیبارٹری،آپریشن تھیٹر، بیس بیس بستروں پر مشتمل دو مردانہ اور ایک زنانہ وارڈ تعمیر ہو نگے۔پہلی منزل پر آئی سی یو، دو مردانہ اور دو زنانہ وارڈ ،پرائیویٹ روم ، آپریشن تھیٹر ، ڈاکٹروں کے کمرے اور دیگر وارڈکو آپس میں لنک کرنے کے لئے کاریڈور تعمیر ہونگے۔

جبکہ دوسری منزل پر مختلف شعبہ جات کے سات وارڈز ، ڈاکٹروں کے کمرے اور سٹور روم شامل ہونگے۔ٹراما سنٹر سے ملحقہ گائنی وارڈ تعمیر ہو گا جس میں 50بستروں پر مشتمل چار عدد گائنی وارڈ، لیبر روم ، آپریشن تھیڑ،ڈاکٹروں کے کمرے اور ویٹنگ روم تعمیر کئے جائینگے ۔ہسپتال کے موجودہ فرنٹ بلاک کی جگہ دو منزلہ ایڈمن بلاک اور آؤٹ ڈور وارڈ تعمیر ہونگے جن پر 3کروڑ 74لاکھ روپے لاگت آئے گی۔

گراؤنڈ فلور پر ڈاکٹروں کے کمروں سمیت 24کمرے تعمیر ہونگے جن میں سرجن ڈاکٹر اور سپیشلسٹ ڈاکٹروں کے کمرے بھی شامل ہیں۔پہلی منزل پر ایڈمن بلاک تعمیر کیا جائے گا جس میں میڈیکل سپر انٹنڈنٹ، اسسٹنٹ ایم ایس، ڈپٹی ایم ایس ، کلیریکل سٹاف کے کمرے ، کمپیوٹر روم اور چا ر بڑے میڈیکل سٹور تعمیر ہونگے۔منصوبہ پر عمل در آمد کے لئے حکومت پنجاب نے13کروڑ 74لاکھ روپے کے فنڈ جاری کر دیئے جس میں سے ابتدائی طور پر 3 کروڑ 74لاکھ روپے محکمہ بلڈنگ کو منتقل کئے جا چکے ہیں۔ انجینئرنگ ڈیپارٹمنٹ نے مجوزہ سائٹ سے مٹی کے نمونے حاصل کرکے معائنہ کے لئے روانہ کر دیئے ہیں ۔ تعمیرات کا باقاعدہ آغاز اگلے چند روز میں شروع ہو جائے گا۔