ملک بھر میں شناختی کارڈز کی تصدیق کیلئے شروع کی جانے والی مہم مقررہ وقت میں مکمل کرنے کو یقینی بنایا جائے ٗوزیر داخلہ کی ہدایت
کم از کم وقت میں تصدیق کیلئے مطلوبہ سسٹم مہیا کیا جائے، شناختی کارڈز کی تصدیق کا کام چھ ماہ کے عرصہ میں مکمل کیا جائے اور اس سلسلہ میں کسی بھی سطح پر نادرا کے کسی اہلکار کے ساتھ کوئی رعایت نہ برتی جائے ٗچوہدری نثار علی خان
بدھ 8 جون 2016 22:40
اسلام آباد(اُردو پوائنٹ اخبارتازہ ترین - این این آئی۔08 جون ۔2016ء) وزیر داخلہ چوہدری نثار علی خان نے نادرا کو ہدایت کی ہے کہ ملک بھر میں شناختی کارڈوں کی تصدیق کیلئے شروع کی جانے والی مہم مقررہ وقت میں مکمل کرنے کو یقینی بنایا جائے ٗکم از کم وقت میں تصدیق کیلئے مطلوبہ سسٹم مہیا کیا جائے۔ وہ بدھ کو یہاں ایک اجلاس کی صدارت کر رہے تھے جس میں سیکرٹری داخلہ، نیکٹا کے نیشنل کوآرڈینیٹر، ڈی جی امیگریشن اینڈ پاسپورٹ، ڈی جی اے این ایف، چیئرمین نادرا، آئی جی اسلام آباد، ڈی جی سول ڈیفنس اور چیف کمشنر اسلام آباد نے شرکت کی۔
وزیر داخلہ نے چیئرمین نادرا کو ہدایت کی کہ شناختی کارڈوں کی تصدیق کا کام چھ ماہ کے عرصہ میں مکمل کیا جائے اور اس سلسلہ میں کسی بھی سطح پر نادرا کے کسی اہلکار کے ساتھ کوئی رعایت نہ برتی جائے۔(جاری ہے)
انہوں نے کہا کہ نادرا نے 105 ملین شناختی کارڈ رکھنے والے افراد کو موبائل کے ذریعے پیغام بھیجنے کیلئے بھی مدت مقرر کی ہے جس پر عملدرآمد ضروری ہے۔
انہوں نے کہا کہ قومی سلامتی کا یہ اہم مقصد صرف اس وقت حاصل ہوگا جب شناختی کارڈز کی تصدیق کے عمل کو کامیاب بنا کر نادرا کے ڈیٹا بیس کے حوالہ سے بدگمانیوں کا خاتمہ کیا جائے گا۔ چیئرمین نادرا نے شناختی کارڈوں کی تصدیق کے حوالہ سے عوام الناس کی آگاہی کے سلسلہ میں نادرا کی جانب سے تیار کی جانے والی خصوصی میڈیا مہم کے بارے میں وفاقی وزیر کو بریفنگ دی۔ چوہدری نثار علی خان نے نادرا کی جانب سے مفرور ملزمان کے حوالہ سے تیار کئے جانے والے سنٹرل ڈیٹابیس فارمیٹ کی بھی منظوری دی۔ وفاقی وزیر کو بتایا گیا کہ ایف آئی اے، آئی سی ٹی پولیس اور اے این ایف نے مرکزی ڈیٹا بینک کیلئے اب تک 60 ہزار 678 مفرور ملزمان کا ریکارڈ فراہم کیا ہے۔ یہ بات قابل ذکر ہے کہ اسلام آباد پولس نے اپریل سے لے کر اب تک 1196 مفرور ملزمان کو گرفتار کیا ہے۔ وفاقی وزیر نے قانون نافذ کرنے والے تمام اداروں کو ہدایت کی کہ نادرا کے تیار کردہ سنٹرل ڈیٹا بیس سے استفادہ کے ذریعے مفرور ملزمان کی گرفتاری کو یقینی بنایا جائے۔ انہوں نے ایف آئی اے، اے این ایف اور اسلام آباد پولیس کو بھی ہدایت کی کہ وہ مفرور ملزمان کی گرفتاری کے آپریشن کو تیز کریں جو مختلف مقدمات میں ملوث ہیں اور ان سے کسی قسم کی رعایت نہ برتی جائے۔ چوہدری نثار علی خان نے آئی جی اسلام آباد کو ہدایت کی کہ وہ بھرتیوں کے حوالہ سے شفاف اور میرٹ پر مبنی نظام تشکیل دیں تاکہ باصلاحیت نوجوانوں کو اسلام آباد پولیس میں بھرتی کیلئے مساوی مواقع فراہم کئے جا سکیں۔ ڈائریکٹر جنرل امیگریشن اینڈ پاسپورٹ نے وفاقی وزیر کو پاسپورٹس کی آن لائن تجدید کے بارے میں بریفنگ دی۔ وفاقی وزیر نے ڈی جی امیگریشن کو ہدایت کی کہ پاکستانی شہریوں کو آن لائن سہولت سے استفادہ کو یقینی بنانے کیلئے اقدامات کئے جائیں گے۔ سیف سٹی پراجیکٹ کے حوالہ سے گفتگو کرتے ہوئے وزیر داخلہ نے ہدایت کی کہ اسلام آباد پولیس انہیں ہفتہ وار رپورٹ بھیجیں تاکہ 125 ملین ڈالر مالیت کے اس منصوبہ سے استفادہ کرنے کے ساتھ ساتھ اسلام آباد میں پولیسنگ کے نظام میں بہتری پیدا کی جا سکے۔ انہوں نے آئی جی پولیس اسلام آباد کو ہدایت کی کہ آئی سی ٹی کے تمام پولیس سٹیشنوں کی ہفتہ وار رپورٹ پیش کی جائے جن میں ایف آئی آرز کے اندراج اور خصوصاً مفرور ملزمان کی گرفتاریوں کے حوالہ سے کئے جانے والے اقدامات کا تذکرہ ہو۔ وزیر داخلہ چوہدری نثار علی خان نے کہا کہ وفاقی دارالحکومت میں قتل، ڈکیتی، اغواء برائے تاوان اور کار چوری کے حوالہ سے مقدمات کی ہفتہ وار تفصیلی رپورٹ بھی پیش کی جائے۔متعلقہ عنوان :
مزید اہم خبریں
-
یو این جنرل اسمبلی: ہر سال 24 مئی کو یوم مارخور منانے کا فیصلہ
-
ملک میں بارشوں کا نیا سلسلہ داخل ہو گیا
-
اگر ملک چلانا ہے تو پھر نیب کے ادارے کو ختم کرنا پڑے گا
-
مشرقی افریقہ: بارشوں اور سیلاب کے دوران یو این امدادی کارروائیاں جاری
-
ایکسٹینشن بربادی کا راستہ ہے
-
سچ یہ ہے کہ یہ الیکشن تحریک انصاف جیت چکی
-
ملک میں رواں سال کی پہلی ہیٹ ویو کا الرٹ جاری
-
اگر میں نے فارم 47 کی بات کی تو ن لیگ منہ نہیں چھپا سکے گی
-
وزیرخزانہ کی ایف بی آرکو محصولات وصولی کا ہدف حاصل کرنے کیلئے ہر ممکن کوشش کی ہدایت
-
گندم اور چینی کا بحران پیدا کرنے کی ایک پوری اکانومی ہے
-
وزیراعظم محمد شہباز شریف سے چیئرمین پاکستان پیپلز پارٹی بلاول بھٹو زرداری کی ملاقات
-
سندھ حکومت سٹنٹنگ سمیت ہر قسم کی غذائی قلت کے خاتمے کیلئے اقدامات کر رہی ہے، وزیراعلیٰ سندھ
UrduPoint Network is the largest independent digital media house from Pakistan, catering the needs of its users since year 1997. We provide breaking news, Pakistani news, International news, Business news, Sports news, Urdu news and Live Urdu News
© 1997-2024, UrduPoint Network
All rights of the publication are reserved by UrduPoint.com. Reproduction without proper consent is not allowed.