سمندری طوفان کل چینی صوبے ہینان سے ٹکرا ئے گا

ہیکو (اُردو پوائنٹ اخبارتازہ ترین - آئی این پی۔ 17 اکتوبر2016ء) چین کا جنوبی ساحلی صو بہ ہینان سمندری طوفان’’ ساریکا ‘‘ کی زد میں ہے جہاں آج سمندری طوفان کے ٹکرانے کا خدشہ ظاہر کیا جارہا ہے ٬ صوبہ ہینان کی انتظامیہ نے گذشتہ روز ایک ہنگامی اجلاس منعقد کیا تا کہ سمندری طوفان سے بچنے کے لئے حفاظتی اقدامات کئے جا سکیں ٬ خدشہ ظاہر کیا جارہا ہے کہ سمندری طوفان سے بڑے پیمانے پر تباہی ہو سکتی ہے کیونکہ یہ طوفان بہت طاقتور ہے ۔

(جاری ہے)

محکمہ موسمیات کی پیشنگوئی کے مطابق یہ اس سال کا 21واں سمندری طوفان ہے جو منگل کی صبح ہینان کے جنوبی مشرقی علاقے میں داخل ہو گا اور کیانگ ہائی اور سانیہ کے شہر اس کی زد میں آئیں گے ٬ انتظامیہ نے حفاظتی اقدامات کے تحت سانیہ میں تما م تعلیمی ادارے بند کرنے کا حکم دیدیا ہے ٬ متعلقہ حکام کو ہدایت کی گئی ہے کہ وہ بجلی اور پانی کی فراہمی جاری رکھنے کیلئے خصوصی انتظامات کریں جبکہ مچھلیوں کے تحفظ کیلئے بھی احتیاطی تدابیر اختیار کی جائیں ٬ پیر کی شام سے ہی ہینان آنے اور جانے والی تیز رفتار گاڑیوں کی آمد و رفت معطل کر دی گئی ہے ٬قریبی صوبے گوانگ ڈانگ نے تمام ماہی گیروں کو ہدایت کی ہے کہ وہ ہینان کے جزیرے کے ارد گرد مچھلیاں پکڑنا بند کر دیں اور ساحل سمندر پر واپس آ جائیں ۔